Azterketak euskaraz egiteko eskubidea aldarrikatu nahi zuten; kolpeka eta negarra eragiteko gasa erabilita, bortizki oldartu zaie Frantziako Polizia. «Frantziako Hezkuntza Ministerioarekin mintzatu nahi dugu, baina Barne Ministerioarekin erantzun digute», laburbildu du Peio Jorajuria Seaskako lehendakariak. Frantziako Gobernuaren debekuei buru egiteko desobedientziarako deia egin du ikastolen elkarteak azken asteetan. Atzo, protestara pasatu ziren.
Hemen azken irudietako bat. Lehenago ere oso bortitz aritu dira. "ikasleak, gurasoak eta irakasleak gara" oihu egiten zien @seaskaikastola-ko kideek @berriapic.twitter.com/DmaVGZwJDK
— Ekhi Erremundegi (@EkhiErremundegi) June 15, 2022
Ehun bat pertsona elkartu dira Baionan, Pirinio Atlanikoetako Akademia Ikuskaritzaren egoitza okupatzeko xedez. «Pap Ndiaye Frantziako Hezkuntza ministroarekin hitz egin nahi dugu, hori da gure galdea, eta hemen gelditzeko asmoz gara», esplikatu du Elorri Falxa irakasleak. Baina Seaskako kideak iritsi direnerako, egoitza itxia zuten, eta Frantziako Polizia bertan zen. Ekintzaileek Azterketak euskaraz eta kitto! zioen pankarta bat zintzilikatu dute teilatutik, eta guraso, irakasle eta ikasle batzuk sarrerako hesira kateatu dira.
Arratsalde bukaeran hasi da tentsioa igotzen. Ikuskaritzako langileak egoitzaren barnean geldituak ziren, eta beraiek ateratzea baliatu nahi izan zuten Seaskako kideek barnera sartu eta okupazioa abiatzeko. Gibeleko atean elkartu dira, blokean. Frantziako Poliziak indarkeria erabiltzeko mehatxua egin die, baina ez dira mugitu.
Bultzaka hasi dira lehenik, baina gero eta bortitzagoa bilakatu da egoera. Ekintzaileak besoetatik eta lepotik hartu, eta tiraka mugitzen entseatu dira poliziak, baina determinazioz erantzun dute egoitza barnera sartzeko asmoz mobilizatutakoek, Azterketak euskaraz! oihuen artean. Bat taldetik ateratzea lortzen zuten bakoitzean, berehala itzultzen zen blokera, poliziaren bultzadei aurre egitera. Gogor ekin dio Frantziako Poliziak, tartean adingabeen kontra. «Ikasle, guraso eta irakasleen kontra ari zarete joka; hori da egiten ari zareten gauza bakarra», oihu egin die Falxak. Baina ez dira gelditu. Azkenean, negar gasa bota die Frantziako Poliziak egoitzaren ate aitzinetik lekutzeko. Begiak eta aurpegia erreta, eztulka eta negarrez; tixerta urratuta batzuk, zauri arinekin besteak; horrela bukatu dute ikasleek azterketak euskaraz pasatzeko eskubidea aldarrikatzera joandakoek.
Tixerta urratuak, zauriak... #AzterketakEuskaraz defendatzeagatik. Hori da @seaskaikastola-ren errealitatea @berriapic.twitter.com/abS35smbWs
— Ekhi Erremundegi (@EkhiErremundegi) June 15, 2022
Okupazioarekin aitzina
Frantziako Poliziak alde egin zuenean, irekita utzitako leiho batetik ikuskaritzara sartzea lortu zuten Seaskako kideek. Bertan pasatu dute gaua, eta Frantziako Hezkuntza Ministerioarekin mintzatzea lortu arte handik ez mugitzeko borondatea erakutsi dute. Frantziako Asanblearako bozen testuinguruan, erantzun politiko baten beha dira.
[AZKEN ORDUA] #AzterketakEuskaraz
— Ekhi Erremundegi (@EkhiErremundegi) June 15, 2022
Akademia Ikuskaritzaren egoitzara sartzea lortu dute @seaskaikastola-ko guraso, ikasle eta irakasleek. Bertan pasako dute gaua. Ekintza aitzina doa @berriapic.twitter.com/CvXroFFMuU
