Elkarrekin solastatzen diren behia eta txakurra, buru handi batez apaindutako furgoneta, dokumentu luzeak minutu batean eta taxian ーez Uberren auto bateanー azaltzea, aldaketa zerbitzatzea edo adimen artifizialarekin egindako txapel erraldoi bat erakustea. Denak du lekua sare sozialetan, eta are gehiago hauteskundeak ate joka diren honetan. Orain hamarkada batzuk herriko paretetan itsatsitako dozenaka kartelek gogoratzen zieten herritarrei kanpaina bazetorrela, eta, orain, berriz, plataforma digitaletako algoritmoarena da ardura hori. Mitinak emateko orduan bezala, sareetan ere nork bere estiloa du: alderdi batzuek seriotasuna dute gidari, eta bertze zenbaitek nahiago dute entretenimendua.
Eredu horiek ez dira ezerezetik sortuak: soinuak nola dantza erakusten duen bezala, alderdi batek sareetan duen presentziak erakusten baitu haren estrategia. Edo eduki mota bera zabalduko dute jarraitzaile kopuru aski desberdina dutenek? Sareetan ikusgaitasun handirik ez dutenek zer egin beharko dute bertzeen pare egoteko? Algoritmoari edo garaian garaiko joerei men egin beharko diete? Zalantza horiek argitzeko gaitasuna alderdien plataformetako kudeatzaileek dute soilik, eta haien estrategien berri egin artean, taldeen edukiari erreparatzea bera ariketa interesgarria da.
Tiktok, Instagram eta X —lehengo Twitter— dira alderdiek gehien erabiltzen dituzten plataformak, eta EH Bilduk du jarraitzaile gehien guztietan, alde handiarekin. Erraterako, Tiktok plataforman 17.700 jarraitzaile ditu koalizio subiranistak, eta Elkarrekin Podemos da bigarrena, 2.560 jarraitzailerekin. Instagramen 30.600 inguru ditu EH Bilduk, eta EAJ du atzetik, 8.677 jarraitzailerekin. X sare soziala da alderdiek gehien erabiltzen dutena, eta, beraz, hartan dute guztiek jarraitzaile gehien: EH Bilduk 88.000, jeltzaleek 37.400, Elkarrekin Podemosek 14.200, PPk 9.579, PSE-EEk 8.671, eta Sumarrek 671.
Koalizio subiranistak komunitate sendoa eraiki du sareetan, eta mitinetako zati indartsuenen bideoak igo ohi dituzte, eguneko agenda eta argazkiak, eta ekitaldi garrantzitsuenen laburpen bideoak ere bai. Azken horiek dira haien eduki bereziena, anitzendako oharkabean pasatuko den txikikeria batengatik: gainerako alderdien laburpen bideoetan, hautagaiek izan ohi dute protagonismoa, baina EH Bilduk bere komunitatean jarri ohi du arreta, eta horiek izaten dira gehien ageri direnak. Hartu-eman horretan egon daiteke, hain zuzen, komunitateak koalizioari sareetan eskaintzen dion babesaren gakoa.
Sareetan bolo-bolo dabiltzan joerei ez diete erreparatzen, baina, tarteka, erreferentziaren bat egin ohi dute. Joan den astelehenean, adibidez, asteburuan Beotibarren (Tolosa, Gipuzkoa) egindako ekitaldiaren irudi batzuk igo zituzten, Aldaketa zerbitzatzen testuarekin. Joera nagusiei adi daudenek jakinen dute azken hilabeteetan sareetan erabili izan den esaldi ezagun bat ekarri dutela beren eredura. Bertze adibide bat da Instagramerako filtro bat sortu izana Pello Otxandiano hautagaiaren betaurrekoak «probatzeko».
Entretenimendua gidari
Seriotasun horren bertze aldean, jeltzaleak dira nagusi eduki bereziagoen zabalkundean. Eduki gehienak helburu berarekin eginak daude: Imanol Pradales lehendakarigaiaren figura hautesleengana hurbiltzea. Lan hori kanpaina abiatu baino lehen hasi zuten, Pradalesen aurkezpen bideoarekin. Lehenbiziko pieza hari gehitu dizkiote bertze hainbat: hautagaiaren egunerokoa nolakoa den jakiteko bideo bat, gazteen errealitateari eta kezkei buruz zer dakien erakusteko elkarrizketa moduko bat... eta Pradalesen familiari eta lagunei egindako elkarrizketa, hautagaiaren berri zabaltzeko.
EAJk badu berriki zabaldutako bertze bideo bat ere, zer errana eman duena: behi bat eta txakur bat solasean ageri dira. Txakurrak hainbat aldaketa proposatzen dizkio behiari —Bittori du izena—, eta hark ezetz erantzuten dio denari. EH Bildu zirikatzeko edukia ez da gisa horretako bakarra, Elkarrekin Podemosek maiz egiten baititu horrelakoak.
Azkena sareetan bolo-bolo ibilitako bideo bat da, EAJri kritika egiteko. Estilo horretako bertze eduki bat argitaratu zuen koalizioak kanpaina hasi baino lehen, non sare sozialetan maiz erabili ohi den bideo eredu bat darabilen EAJ eta PSE-EE zirikatzeko. Gisa horretako bideoak dira moreek zabaldu ohi dituzten berezienak, kritika xede dutenak gehienak, umorez eginak. Horrez gain, kanpaina hasieran ezaguna egin zen Miren Gorrotxategi hautagaiak beren programa taxian eta minutu batean aurkeztu zuenekoa. Ez dute beren hautagaiari buruzko eduki berezirik egiten, seguruenik Gorrotxategi delako hautagai guztietan ezagunena, Soziometroaren arabera.
Sozialistek eduki bereziena ez dute kritika egiteko baliatzen, ezta beren hautagaia ezagutarazteko ere: estilo propioa dute. Denak baitu lekua sare sozialetan. Adibidez, Enekoneta izeneko furgoneta aurkeztu zuten joan den astean. Eneko Andueza lehendakarigaiaren aurpegia duen ibilgailu bat da, eta sozialisten programa gazteei hurbiltzea da haren helburua.
PPk eta Sumarrek apenas duten eduki berezirik: egunekoak zabaltzeaz arduratzen dira, bakoitzak bere programa azaltzen du, eta debateetako pasarteak ere jartzen dituzte; ez dute ahalegin handirik egiten beren hautagaiak ezagutarazteko, sareetan behintzat.
35.000Ikustaldi kopurua. PP da sare sozialetan hartu-eman gutxien duten alderdietako bat. Hala ere, Instagramen 1.500 jarraitzaile inguru izanda, kontu horretan jarritako bideo bat kanpainan gehien ikusi direnetako bat izatea lortu zuten. Adimen artifizialaren laguntzaz egin zuten pieza hori, eta horrek zer erran handia eman zuen.
Hizkuntzari erreparatuta, EH Bildu da, desberdintasun handiarekin, euskarazko eduki gehien zabaltzen duena. EAJ du atzetik, zeinak edukia ele bitan argitaratu ohi duen. Elkarrekin Podemosek tarteka euskarazko edukia zabaltzen du, PSE-EE eta Sumarrek apenas egiten duten euskaraz, eta PPk gaztelaniaz egiten du. Alderdi bakoitzak bere estiloarekin jardun du sareetan ere, eta guztiendako egon da lekua hamabortz egunotan. Ikusteko dago igandetik aitzinera zer gertatuko den.
