Joan den urteko azaroan iritsi ziren Espainiara Palestinako 26 familia, Gazako gerratik ihesi, eta autonomia erkidego batzuen artean banatu zituzten. Palestinako eta Espainiako nazionalitate bikoitza duten familia horietako bosten harrera —hamar adingabe barne— kudeatu zuen Eusko Jaurlaritzak, eta urtebete daramate Gasteizen bizitzen. Denbora honetan guztian, Madrilek ostatua eta mantenua ordaindu die, harrera programaren bitartez, baina abenduaren 31n Espainiako Gobernuak laguntza hori eten egingo die, eta oso zaila izango dute hemen bizitzen jarraitzea.
Euskal Herriko Etxebizitza Sindikatuak eta Kontseilu Sozialistak gaur egin dute salaketa, Gasteizen. Familia horietako kide batzuk ere prentsaurrekoaren lehen lerroan izan dira, Palestinako bandera eta etxebizitza eskubidearen aldeko afixak agerian erakutsiz. Familia horien bizi baldintzak «jasanezinak» direla ohartarazi du Euskal Herriko Etxebizitza Sindikatuko bozeramaile Karla Pisanok, eta Espainiako Gobernua eta Eusko Jaurlaritza egin ditu erantzule.
Jakinarazi duenez, azken urtebetean familia horiek aterpetxeetan eta hoteletan egon dira, «pilatuta», janaria prestatzeko aukerarik eta bizitza garatzeko leku nahikorik gabe, nahiz eta Eusko Jaurlaritzak ziurtatu baliabide guztiak prest zituela haien ongizatea bermatzeko. Are, gutxienez hiru aldiz mugitu dituzte lekuz, haien borondatea kontuan hartu gabe. Eta hori gutxi balitz bezala, abuztuan jakinarazi zieten Espainiako Gobernuak harrera proiektua finantzatzeari utziko ziola eta, beraz, urriaren 31n harrera programa laga beharko zutela. Azkenean, baina, abenduaren 31ra arte luzatu diete programa, baina behin finantzaketa etenda, ezin izango dira euren kabuz hemen bizi.
Etxebizitza Sindikatuak salatu du azken urtebetean Palestinako bost familia aterpetxeetan eta hoteletan egon direla, «pilatuta», eta bizitza garatzeko leku nahikorik gabe
Laguntzarik gabe etxebizitza bat lortzea ezinezko zaiela ohartarazi du Pisanok: «Pertsona hauek gerra batetik datoz, basakeria batetik ihesi, eta ezin dute euren bizitza normal garatu. Beraz, ez da aukera bat merkatu librean etxebizitza bat topatu arte itxaroten egotea». Gaur-gaurkoz, ez diete behin betiko etxebizitza baten alternatibarik aurkeztu, eta oso zaila dute beren kasa lortzea, sindikatuko kideak azpimarratu duenez.
Iruzurren biktima
Familia batzuek alokairuzko etxebizitzak bilatzen dituzte, baina ezinezko egiten zaie ezer topatzea, etxeen jabe gehienek «filtro arrazistak eta klasistak» dituztelako: «Nominak aurkezteko eskatzen diete, baina gerratik atera berriak badira, zer nomina aurkeztuko dute?». Sindikatuko kideak salatu du jabeen iruzurren biktima ere badirela batzuk; kontatu du familia horietako bat, etsipenak jota, alokairuko iruzur baten biktima izan berri dela, eta existitzen ez den etxebizitza bat ikusi ahal izateko 700 euro ordaindu duela.
«Nominak aurkezteko eskatzen diete, baina gerratik atera berriak badira, zer nomina aurkeztuko dute?»
KARLA PISANOEuskal Herriko Etxebizitza Sindikatua
Palestinako familia horiek duten egoera «berehala» amaitzeko eskatu du Etxebizitza Sindikatuak, eta Espainiako Gobernuari eta Eusko Jaurlaritzari zera eskatu die: asilo eskaeren ebazpena ahalik eta gehiena bizkortzea, eta «kalitatezko» eta «behin betiko etxebizitza baten alternatiba» bermatzeko. Gasteizen bizi diren familia horien antzeko egoeran daude Palestinako beste familia batzuk Euskal Herrian, eta haiei dei egin diete euren egoeraren berri sindikatuari emateko.
