Apurka-apurka, argituz doa nortzuk lehiatuko diren Eusko Jaurlaritzako lehendakari izateko. EAJko Euzkadi Buru Batzarrak Iñigo Urkullu proposatuko du zeregin horretarako, eta martxoaren 7an izendatuko dute; beharrezko gehiengoak lortuz gero, hirugarren legealdia luke Ajuriaenean. Gaur, EH Bilduk jakinarazi du Mahai Politikoak Maddalen Iriarte proposatuko duela Jaurlaritzako lehendakarigai izateko. PSE-EEk ere erabakia du Idoia Mendia izango dela sozialisten hautagaia; 2016an aurkeztu zen aurrenekoz, eta bigarrenez lehiatuko da orain lehendakaritzara heltzeko.
Ahal Dugu-n ere badira mugimenduak. Rosa Martinez Equoko bozeramaile ohiak (Leon, Espainia, 1975) hautagaitza aurkeztuko du Ahal Dugu-ko primarioetan; bihar aurkeztuko du bere hautagaitza, Lander Martinez idazkari nagusiak eta Cristina Makazaga Jarduera Instituzionaleko idazkariak lagunduta. Rosa Martinez Espainiako Kongresuko diputatu izan zen, 2015eko eta 2016ko bozetan Bizkaian aurkeztuta. Gaur egun, Elkarrekin Podemosek Eusko Legebiltzarrean duen taldearen koordinatzaile lanetan dihardu.
Ahal Dugu-k herenegun onartu zuen primarioen egutegia; horren arabera, otsailaren 2tik 7ra bitartean edukiko dute hautagaiak aurkezteko epea. Otsailaren 23tik martxoaren 1era egingo dute kanpaina, eta martxoaren 4an izendatuko dute lehendakarigaia.
PPk ere oraindik ez du argitu zein izango den beren hautagaia, baina alderdiko kide ugarik Alfonso Alonso Euskal Autonomia Erkidegoko PPko presidentearen hautagaitza babestu dute.
