Ride On-ek atzera egin du eta Iruñeko bizikleta elektrikoen zerbitzua mantenduko duela esan du

LAB sindikatuak salatu duenez, enpresak bi soldata oso zor dizkie langileei. Iruñeko Udalarekin bildu ostean zerbitzua bere horretan mantentzea erabaki du Ride Onek.

Iruñeko Bizifest jaialdia, iragan irailean. Erdiko emakumeak Ride On bizikleta bat erabiltzen ari da. IDOIA ZABALETA / FOKU
Iruñeko Bizifest jaialdia, iragan irailean. Erdiko emakumeak Ride On bizikleta bat erabiltzen ari da. IDOIA ZABALETA / FOKU
Mikel Garcia Martikorena.
2025eko apirilaren 3a
15:05
Entzun 00:00:0000:00:00

Iruñeko herritarrek bizikleta elektrikoak erabiltzeko aukera izango dute aurrerantzean ere, baina larri dabil zerbitzua. Ride On enpresak, gaur goizean, zerbitzua bertan behera utziko zuela mehatxu egin du, baina azkenean atzera egin, eta zerbitzua bere horretan mantentzea erabaki du, Iruñeko Udalarekin bildu ostean. Udalak ohar bidez jakinarazi duenez, aurreakordio bat sinatzekoak dira bi aldeak, enpresak bizikleta elektrikoen zerbitzua mantendu dezan eta, aldi berean, Ride Onen bideragarritasun ekonomikoa ziurtatzeko.

Goizean, Ride On enpresak iragarri du bertan behera utziko zuela zerbitzua apirilaren 5ean, larunbat honetan. Enpresak argudiatu du Iruñeko Udalaren laguntzarik gabe jardun duela hasieratik, eta, gaur-gaurkoz, ezinezkoa zaiela horrek eragiten dituen galerak «denbora gehiagoz jasatea». «Kontratua esleitu ondoren udalak hartu duen erabaki bakoitzak, hiriaren beste esparru batzuetarako positiboak izan daitezkeen arren, bideragarritasun ekonomikotik urruntzen gaitu, diru sarrerak murrizten dizkigu eta kudeaketa kostuak modu esponentzialean handitzen», esan du Ride On enpresak bere ahots-postontzian utzi duen mezuak.

LAB sindikatuak, bestetik, salatu du Ride On enpresako langileak «egoera larri» batean daudela. Ohar bidez jakinarazi duenez, sei hilabete daramatzate atzerapenekin soldatak kobratzen; eta azken bi hilabeteetan egoera are gehiago okertu da: «Bi soldata oso zor dizkie langileei». Gainera, baliabide materialak zein giza baliabideak ez direla nahikoak salatu du LABek. Azaldu duenez, bi mekaniko daude, eta guztira 600 bizikleta baino gehiago daude.

2022an abiatu zuten bizikleta elektrikoen zerbitzua Iruñean, eta, gaur egun, 60.000 herritar inguruk erabiltzen dute urtean. Hori dela eta, enpresak alderdiei eskatu die bizikleta elektrikoen «sistema arrakastatsua» ez erabiltzeko «arma politiko gisa». Enpresak nabarmendu du udal gobernuko zein oposizioko alderdiek ezagutzen zituztela enpresaren arazo ekonomikoak: «Azken hiru urteetan alderdi politiko eta arduradun ezberdinak txandakatu dira gobernuan, eta horiei guztiei laguntza eskatu diegu». Horiek horrela, «alde guztientzako onuragarria» izango den irtenbide bat bilatzeko eskatu die enpresak alderdiei.

Iruñeko Udalak bizikleta elektrikoen garrantzia azpimarratu du; eta prezio murriztuak izateko aukera marra gorritzat jarri du. «Iruñeko herritarrentzat zerbitzuak duen garrantzi sozial eta ekonomikoagatik, bizikleta elektrikoak mantentzen saiatuko gara», zehaztu du udalak oharrean.

640

Ride Onek  Iruñean dituen bizikleta elektrikoak Ride On enpresak bizikleta elketrikoen zerbitzua eskaintzen hasi zenean, 2022an, 400 bizikleta jarri zituen eskuragarri. Erabilerak gora egin ahala, bizikleta kopuruak ere egin du gora. Horiek horrela, gaur egun 640 bizikleta elektriko daude Iruñean. Horiek hiriko hamalau auzotan daude.

Ride Onen erabakiak ustekabean hartu du udala. Proiektu Estrategiko, Mugikortasun eta Jasangarritasun Alorretik adierazi dutenez, «erabiltzaileekin batera» jakin dute zerbitzua bertan behera uzteari buruzko berria. Bi aldeak elkartu ostean udalak zabaldutako oharrean, udalak berak onartu du hilabeteak zeramatzatela negoziazioetan. Zerbitzuak duen «garrantziaren jakitun», udalak zein Road Onek erabaki dute aurreakordio bat sinatu aurretik ez dutela negoziazioen inguruko xehetasunik emango. Udalak eskua luzatu dio enpresari, eta adierazi dutenez, zerbitzua mantentzeko nahia partekatua da; hortaz, akordio batera heltzeko aukerak «handiak» direla esan du udalak.

Aurreko agintaldiaren errua

Joseba Asiron alkate bihurtzea ahalbidetu zuen PSNk, 2023an, eta aurreko gobernuari egotzi dio zerbitzuaren egoeraren ardura; hau da UPNri eta PPri. «Aurreko gobernuak egindako esleipenaren plangintza txarraren ondorioa da gaurkoa, publiko gisa aurkezten baitzen, baina, egitan, pribatua baita», adierazi du PSNko bozeramaile Marina Curielek. Halere, EH Bilduri dei egin dio, «ahalik eta lasterren» jardun eta auzia bideratzeko.

UPNk, berriz, Asironen «hipokrisia» gaitzetsi du. Oposizioko alderdi nagusiaren hitzetan, alkateak «ekologismoaren eta mugikortasun jasangarriaren bandera» bereganatu nahi duen arren, haren ekintzak bi ideia horien aurka doaz: «Zentsura mozioa iritsi zenean, Iruñeko Mankomunitatearekin lanean ari ginen, zerbitzua eskualdera zabaltzeko. Orain, Asironek alkatetzan urte eta erdi egin ostean, Iruñean desagertu egin da». Alkateari exijitu diote «esfortzu bat» egiteko zerbitzua hirian mantentzeko.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.