PSOEk ziurtatu du Bildurekin ez duela hitz egiten, «ez itunik egiten»

Iragan larunbateko PSNko zuzendaritzaren proposamenak Ferrazen sinadura zeraman. Han, zentsura mozio aipatu gabe Bildurekin izan ezik gainerako parlamentu taldeekin elkarrizketak hastea proposatzen zen. Atzo PSOEk Nafarroako Gobernutik UPN kentzeko operazioa Espainian saltzeari ekin zion. Soraya Rodriguez Espainiako Kongresuko PSOEko eledunak azpimarratu zuen ez zuela Bildurekin ez hitz egiten «ez itunik egiten». «Beste gauza bat da bozketan bat egitea», gaineratu zuen. Argi utzi nahi izan zuen elkarrizketa horietatik «baztertu» egingo dutela Bildu. «Ikusiko dugu zer ematen duten elkarrizketa horiek», zioenSoraya Rodriguezek. PSOEren posizioa «argia» dela deritzo.

Mugimendua ez zaio oharkabean pasatu PPri. Esteban Gonzalez Pons PPko buruzagiak exijitu du «jendaurrean» argitzeko ez dutela Bildurekin gobernatuko. Haren ustez, PSOEk Nafarroan Bilduren botoez baliatu nahi izatea «politikoki ezmorala da». Baina Rubalcabaren arazoa ez da moraltasuna, ezgaitasuna baizik».

Dena den, PSOEren jarrera horrek denbora eman dio PSNri. Zuzendaritzaren proposamena etzi aztertuko du alderdiko organo gorenak, Lurralde Batzordeak. Pedro Rascon PSNren alboko eledunak atzo esan zuen zentsura mozioa aurkezteko hamar parlamentari izan behar direla eta PSNko bederatzirekin zein beste alderdi bateko legebiltzarkide batekin nahikoa izango dela. «Aurkezten bada mozioa, ez dugu Bilduko ezein parlamentari behar. Onartzeko, berriz, bozkatu nahi duenak bozkatzen du. Hemen Bilduk PPrekin edo UPNrekin bozkatzen duenean ez da ezer gertatzen».

Bildu kanpoan zergatik geratzen den galdetuta, Rasconek adierazi zuen ez duela esango «ez zergatik bai, ez zergatik ez». Ukatu zuen Ferrazek ezer inposatu izana: «Ni hemen nago eta hemen autonomia dugu. Hau PSN da, eta Madrilek inposatzen duenari buruz ez dakit ezer». Bazterrak nahasten ari al diren galdetuta, Rasconek uste du ezetz. «Modu arduratsuan jokatu dugu, zenbaitetan haizea kontra izan dugula». PSNko ordezkariak «lasaitasuna» aldarrikatu du. «Mundu guztiak presio egiten du. Komunikabideek presio egiten dute, Barcinak presio egiten du, UPNk, beste alderdiek... Rubalcabak ez du presio egiten».

UPNko Carlos Garcia Adaneroren arabera, PSNren jarreraren atzean Bildurekin hitzartutako isileko ituna dago. Haren ikuspuntutik, «ezer ez da doan»: «Bilduren botoa ezinbestekoa da edozein zentsura mozio aurrera ateratzeko. Ez gaitzatela ergeltzat har. Gobernu bat kentzeko eta beste bat jartzeko estrategia bateratua izan behar du, eta bestela ez da aurrera ateratzen».

UPNren bilera

Arratsaldean UPNren zuzendaritzak ohar bat kaleratu zuen. UPNren esanetan, PSNk iruzur egin nahi dio gizarteari. «Norbaitek Bilduren laguntzak PSNk eraikitako azpijoko hori sinetsi nahi badu, egoera dirudiena baino larriagoa da». UPNren esanetan, PSN Bildurekin bildu da eta harekin harremana du. «Dei egiten diegu PSNri nafarrei egia esan diezaien. Zentsura mozioa aurkezteko eskubidea dute, baina iruzur eta tranpa egin gabe».

Aralar NaBaiko Patxi Zabaletak kritikatu egin du, berriz, PSNk Bildurekin bildu nahi ez izatea. «Bilera horretara joango gara, baina argi utziko diegu bazterketaren aurka gaudela». Zabaletaren irudiko, bazterketarik eza onartzen den egunean etorriko da aldaketa. «Guretzat ezinbesteko printzipioa da. Larria deritzogu, kontrakoa egin nahi dutenak egoteari, zantzu txarra da». «Nafarrak garena gara. Inork ez dio zergak ordaintzeari edo beste bete beharrak egiteari uzten, eta inor ez da baztertu behar bere erlazio politikoengatik», gehitu du.

Geroa Baiko Manu Aierdik dio «erantzukizunez» jokatuko dutela eta alderdi guztiekin hitz egiteko gertu direla. Haren ustez, gauza bat da akordioarekin bat egitea, eta besterik botoan bat egitea. «Gerta liteke batzuek ituna egin nahi izatea eta beste batzuek botoa eman nahi izatea». Egoerak eskatzen duen mailan egongo direla ziurtatu du.

Ezkerrako JoseMiguel Nuinek esan du «dena» egingo dutela maiatzaren 25ean bozak egon daitezen.