Prokuradoreak espetxe zigorra eskatu du Parisko epaiketako auzipetuentzat

Maiatzaren 4an ETAk bere ibilbidea behin betiko amaitu osteko lehen epaiketa handia izaten ari da astelehenean Parisen hasitakoa.2015eko uztailaren 7an atzeman zituzten Jeff Mateo, Terexa Lekunberri eta Graxi Etxebehere. Orain, prokuradoreak 12 eta 18 hilabeko zigorra eskatu du hirurentzat, «ETAko kideak etxean hartzeagatik». Iñaki Reta eta Xabier Goienetxea ere atxilotu zituzten orduan. Prokuradoreak zortzi eta bederatzi urteko espetxe zigorra eskatu du haientzat, hurrenez hurren, ETAko kide izatea leporatuta. Gaur eguerdian emango du epaileak ebazpenaren berri.

Defentsek esan dute «bake prozesu baterako urratsak» egiten ari zirela akusatuak. Bestela uste du fiskalak, eta, 12 hilabeteko espetxe zigorra eskatu du Mateorentzat eta Lekunberrirentzat. Etxebeherentzat, berriz, 18 hilekoa eskatu du. 12 hilabeteko gibelaldia aplikatuta, lehen biek ez lukete espetxera joan behar. Goienetxearentzat eta Retarrentzat, berriz, zortzi eta bederatzi urte arteko zigorrak eskatu ditu fiskalak.

Akusatu guztien abokatuek eskatu diote fiskalari kontuan hartzeko egungo testuingurua; «ETAren behin betiko amaieraren ostekoa». Are, Retak eta Goienetxeak eskatu dute kontuan hartzeko 2011ko urria mugarri bat izan zela, eta atxiloketen unerako ETAk ia lau urte zeramatzala behin betiko su-etenean. Goienetxeak asmoen berri ere eman du: «ETAk bake prozesu negoziatu bat egin nahi zuen, baina ezinezkoa izan zen, eta aldebakarreko prozesua egon da».

Prokuradoreak, ordea, esan du testuingurua aintzat hartu duela, eta horregatik egiten ari direla epaiketaauzitegi korrezionalean gehienez ere 10 urteko espetxe zigorra jaso dezakete bertan. Ordea, esan du ezin dela «ETAren biolentzia» ahaztu, eta 2011 ez zela mugarria izan: «Zertan desberdintzen dira aurreko eta ondorengo militanteak? Ezertan ez. Oraindik ere aktibo zeuden». Hortaz, Etxebehereri, Lekunberriri eta Mateori «ETAko militanteak laguntzea» leporatu die.

Gaur emango dute epaia, eta Lekunberrik epaileari eskatu dio bake prozesuan «engaiatzeko». Hala esan du Retak ere: «Izugarria da hiru horientzat espetxe zigorra eskatzea; Euskal Herrian ez du inork ulertuko».

Etenik ez elkarrizketetan

Frantziak ukatu egin du euskal presoekiko jarrera aldatu izana, eta gezurtatu egin du harremanak «eten» direla, bakegileek esan moduan. Parisen arabera, Euskal Herritik urrun segitzen dutenetako batzuk «odol delituengatik» daude zigortuta: hori da ez gerturatzeko arrazoia. Andreak hurbiltzea ezinezkoa dela ere esan dute, ez dagoelako haientzako espetxerik hurbil.