Profersa enpresak atzo arratsaldean bidali zion eusko Jaurlaritzari Zorrotzako ongarri lantegia berriz irekitzeko dokumentazioa. Ia ordu berean, Bilboko San Inazio auzoan batu ziren ehunka herritar Profersa bera eta Sader enpresa Bilboko Zorrotza auzotik kanporatzeko eskatuz.
Ongarri fabrika da Profersa, eta azken hilabeteetan bi intzidentzia gertatu dira bertan: apirilaren 26an lehena, eta maiatzaren 11n bigarrena. Bietan, ke zuria isuri zen, eta inguruko herriguneak hartu zituen. Azken istripuaren ostean, Eusko Jaurlaritzak ikuskapen bat egin eta behin-behinean lantegia ixteko agindu zuen. Profersari eskatu zioten konponketa teknikoak egiteko jarduerara itzuli ahal izateko. Bada, atzo, enpresak berriz ere lantegia martxan jartzeko dokumentazioa bidali zion Jaurlaritzari. Orain, Ekonomiaren Garapen, Jasangarritasun eta Ingurumen Saileko teknikariek lantegia bisitatu eta berriz ireki edo ez erabakiko dute.
Bitartean, herritarrek enpresa kanporatzeko protestak egiten jarraitzen dute. Atzo bertan, Bilboko San Inazio auzoan, 350 lagun batu ziren —Bilboko Udaltzaingoaren datuak dira— Sader-Profersa Kanpora plataformak deituta. Gainera, plataformak X sare sozialean salatu duenez, protestan ari ziren bitartean ongarri fabrikatik kea ateratzen ari zela ikusi zuten.
San Inazion egon gara gaur, Sader eta Profersa Bilbotik alde egin behar dutela eskatzeko.
— Sader Profersa Kanpora (@saderprokanpora) June 6, 2024
A la finalización de la mani, hemos podido observar como salía humo de Profersa, @agaleus algo que explicar? @Irekia no ibais a vigilar?#SaderProfersaKanporapic.twitter.com/P5Ue1L97Da
Aurtengo apirilean sortu zuten Sader-Profersa Kanpora plataforma inguruko zenbait taldek, auzo elkartek eta erakunde ekologistak. Sader hondakinak tratatzeko lantegi bat da, eta Profersaren alboan dago. Gainera, biak ala biak jabe berarenak dira: Agaleus taldearenak.
Bizilagunen kexak aspaldikoak dira. Urteak daramatzate salatzen bi lantegietatik kiratsa ateratzen dela, baita kea ere. Gainera, isuri horiek zorabioak, eztarriko mina eta begietako azkura eragiten dizkietela ere jakinarazi izan dute. Horregatik, auzokideek behin eta berriz eskatu dute airearen kalitatea neurtzeko gailuak jartzeko —aurrez zegoen bat suntsitu egin zuten, 2023an—. Eta, dirudienez, Eusko Jaurlaritza jada lanean ari da bi neurgailu berri martxan jartzeko; hori baieztatu du El Correo hedabideak.
