Etxerat-ek jakinarazi duenez, Araba, Bizkai eta Gipuzkoako presoei jarria diete jada COVID-19aren aurkako txertoa, baita Kantabriako eta Leongo espetxeetan daudenei ere: «Badakigu ehuneko ehunean ez bada hau bete, bide onetik doala». Ez da, ordea, hori egoera Iruñeko kartzelan eta Espainiako Estatuko bertze espetxeetan, eta horietan dauden presoei koronabirusaren txertoa «premiaz» jartzeko eskatu du Etxerat-ek. Izan ere, euskal presoen senideen elkarteak gogoratu du «arrisku handiko kolektiboa» dela presoena, eta «ezinbestekoa» dela egoera horri «erantzun egokia» ematea. Hala, Etxerat-en ustez «presazkoa eta lehentasunezkoa» da «preso guztiak» txertatzea. Horrek bide emanen lioke, halaber, komunikazioak berreskuratzeari, eta hala nahi du senideen elkarteak: azken hilabeteetan etendako komunikazio intimoak, familiarrak eta bizikidetzakoak berreskuratzea.
Presoei ezartzen dizkieten berrogeialdiak eten eta PCRak egin diezazkietela ere eskatu du Etxerat-ek: «Proba horiek bai lekualdaketen aurretik, bai behin helmugara iritsitakoan egin beharko lirateke, eta neurri hori, halaber, barne komunikazioak eta familia komunikazioak egin ostean aplikatu daiteke». Etxerat-ek adierazi du, era berean, ezin dela «onartu» berrogeialdian dauden preso batzuek baimenetatik edo bertze espetxe batzuetatik itzuli diren presoekin ziega partekatu behar izatea.
Euskal presoen senideen elkarteak berretsi du «premiazkoa» dela osasuna eta segurtasuna «lehenestea», eta, horrekin batera, presoek eskubideak errespetatzea. Etxerat-en ustez, ez baita hala gertatzen: «Zoritxarrez, Espainiako Espetxe Erakundeek COVIDaren kudeaketaren inguruan hartzen dituzten erabakiek presoen eta haien eskubideen murrizketak dakartzate».
