Presoak etxeratzearen alde manifestatzera deitu du Sortuk larunbaterako

Apirilaren 17an ospatzen da Preso Politikoen Nazioarteko Eguna, eta, egun hori kari, presoak aske uztea exijitzeko manifestazioakegitera deitu du Sortuk, Donostian, Bilbon, Gasteizen eta Iruñean. Alderdiak «konponbide politikoak eskatu ditu arazo politikoentzat», eta preso politikoen aferari irtenbidea emateko eskatu du. Horretarako, beharrezkotzat jo ditu kontsentsu zabala eta mobilizazio soziala.

Hain zuzen ere, atzo egindako agerraldian, manifestaziorako deia egiteaz gain, Askatasuna izeneko adierazpena aurkeztu zuten Sorturen Kontseilu Nazionaleko kide Kizkitza Gil de San Vicente eta Aimar Altunak. Horiekin batera ziren Euskal Preso Politikoen eta Euskal Iheslari Politikoen Kolektiboko hainbat kide. Adierazpenean nabarmentzen dutenez, euskal preso eta iheslari politikoak gatazka politikoaren ondorio eta adierazpide dira, eta horien kontra aplikatutako neurri guztiak «politikoak» eta «kolektiboak» dira.

Halaber, esan dute azken hamarkadan ezker abertzaleak eta euskal gizarteak gatazka bideratzeko urrats erabakigarriak egin dituztela eta baldintza eta adostasun nahikoa sortu direla Espainiako Estatuak konponbideari heltzeko. Arazo politikoei konponbide politikoak eman behar zaizkiela exijitu dute, eta nabarmendu Espainiak ezin duela bertze alde batera begiratzen jarraitu.

Bide horretan, elkarbizitza demokratikoak preso politikoen askatasuna eskatzen duela nabarmendu dute, eta gizartea mobilizazioetan parte hartzera deitu dute.