Preso sartu dute Irastorza, eta aske utzi hura etxean hartu zuen bikotea

Mikel Irastorza presondegian sartzea erabaki zuen atzo arratsaldean Parisko «terrorismoaren kontrako» epaileak. Ustezko ETAko kidea larunbatean atxilotu zuten, Azkaineko etxe batean. Atxiloketaren ondoren prentsari egindako adierazpenetan, ETAren aparatu logistikoko «buruzagi» gisa aurkeztu zuen Juan Ignacio Zoido Espainiako Barne ministroak, baina, justizia iturriak aipatuta Espainiako hedabideek zabaldu dutenaren arabera, presondegiratzeko eskaeran prokuradoreak ez du «buruzagi» kargua atxiki.

Halaber, Irastorza aurkitu zuten etxearen jabeak aske uztea erabaki du epaileak. Xabier eta Denise Arin, hain zuzen, Irastorzarekin batera atxilotu zituzten larunbatean. Prokuradorearen eskaerari jarraikiz, kontrol judiziala ezarri diete; atzo gauean iritsi ziren Azkainera.

«Interpelazio» ekinaldia

EH Bildu eta EH Bai koalizioek prentsaurreko bateratua egin zuten atzo, Baionan, larunbateko atxiloketak salatzeko. Salatu zuten «ulertezina» dela gaur egun gertatzen ari dena. «Ez da seriosa: lanjerosa da», deitoratu zuen Jakes Bortairu EH Baiko kideak. Aieteko Adierazpenak markatutako bide orriarekin bat egiten dutela adierazi zuten, baina Frantziak eta Espainiak ez dutela gauzatzen «beraiei dagokiena».

Halaber, Frantzian den giro orokorra ere «kaltegarritzat» jo zuen Anita Lopepek. «Terrorismo islamiarraren kontra neurri zorrotzak hartzen dituzte, baina gero euskaldunei aplikatzen dizkiete», salatu zuen.

Armagabetzea modu egiaztagarrian egiteko beharra azpimarratu zuen EH Bilduko Marian Beitialarrangoitiak, nazioartearen parte hartzea eta ETAren konpromisoa bermatuak direla iritzita. «Nahiago dute zulo bat aurkitu, zulo guziak aurkitu ordez; nahiago dute horretan ari den jendea atxilotu eta armagabetzea trabatu». Aurki Frantziako eta Espainiako Gobernuak «interpelatzeko» ekinaldi zehatza aurkeztuko dutela iragarri zuten.