«Agintean gaudenean, sozialistok politika klimatikoak agenda sozialean eta politikoan jartzen ditugu». Hori izan zen Jose Ignacio Asensiok, PSE-EEren Gipuzkoako ahaldungai nagusiak, atzo helarazi nahi izan zuen mezua. Irungo (Gipuzkoa) Osinbiribil parkean egindako ekitaldian, Bidasoa ibaiaren ertzean, ondoan izan zituen Teresa Ribera Espainiako Gobernuko Trantsizio Ekologikoko ministroa eta Jose Antonio Santano Irungo alkategaia.
Asensio Ingurumen diputatua da Gipuzkoako Foru Aldundian, eta atzo nabarmendu zuen postu horretan egon den bitartean Gipuzkoa klima aldaketaren aurkako borrokaren «abangoardian» jarri duela. Udalerri ugaritan komunitate energetikoak bultzatu izana goretsi zuen, besteak beste. Azaldu zuen komunitate horiei esker 8.000 familiak %30 gutxiago ordaintzen dutela energiaren faktura.
Irungo alkategaiak, berriz, martxoan Espainiako Gobernuaren eta Irungo Udalaren artean egindako akordio bati eman zion garrantzia; Artiako kanala birnaturalizatzeko proiektuari, alegia. Esan zuen urte askotan Bidasoari «bizkarra» eman ostean hari begira jarri duela Irun.
Riberak ere proiektu hori nabarmendu zuen, eta Asensio eta Santano goraipatu. Adierazi zuen bi sozialistak «oso aktiboak eta eraginkorrak» izan direla trantsizio ekologikoa bultzatzerako orduan.
Hirurek esan zuten Espainiako Gobernuaren, Gipuzkoako Foru Aldundien eta Irungo Udalaren arteko harremana «eraginkorra» izan dela, «sozialistei esker».
Udal eta foru hauteskundeak. Gipuzkoa
Politika klimatikoak Gipuzkoako agendan jarri dituela aldarrikatu du PSEk
Jose Ignacio Asensiok komunitate energetikoak aldarrikatu ditu, eta Jose Antonio Santanok, berriz, Irungo Artiako kanalaren birnaturalizazioa
![Andueza, Asensio, Santano eta Ribera, atzo, Irunen. GORKA RUBIO / FOKU. Andueza, Asensio, Santano eta Ribera, atzo, Irunen. GORKA RUBIO / FOKU.](https://www.berria.eus/uploads/s1/73/61/00/p007-f01.jpeg)
Iruzkinak
Ez dago iruzkinik
Ordenatu