Urtearen hasieran iritsi zen albistea, aurrematrikulazioa hasteko egun gutxi falta zirela: EAEko Justizia Auzitegi Nagusiak baliogabetu egin zuen Arabako, Bizkaiko eta Gipuzkoako ikastetxeen sarea antolatzeko eta planifikatzeko irizpideak ezartzen dituen dekretua; EHIGEk eta Steilasek dekretuari 2023an jarritako helegitea onartu zuen horrela. Gaur, auzi horri buruz mintzatu da Eusko Jaurlaritzako Hezkuntza sailburu Begoña Pedrosa Eusko Legebiltzarreko Hezkuntza Batzordean, EH Bilduk eskatuta. Nabarmendu du ez duela eragin ziurgabetasunik matrikulazioan: «Ez dago inolako ziurgabetasunik, ez dago segurtasun faltarik. Ez dio eragiten momentuko matrikulazio prozesuari».
Ikoitz Arrese EH Bilduko legebiltzarkidea izan da hitza hartzen lehena. Beren-beregi dekretuaz hitz egiterako, Hezkuntza Sailaren jarreraz aritu da. Aipatu du urtarrilaren 15ean eskatu zutela sailburuaren agerraldia eta gaur egin duela, apirilaren 2an: «Gure ustez, hau ez da Hezkuntza Sailak izan behar duen jarrera». Eta zera galdegin dio Pedrosari: «Hezkuntza sailburuak uste du begirunez erantzuten diola legebiltzar honen eskaerei?». Behin kritika hori eginda, dekretua baliogabetu izana ere izan du hizpide. Dioenez, ados daude dekretuaren «norabidearekin», baina irizten dio ez dela nahikoa, eta sailburuari galdegin dio beste dekretu bat egitea, «modu kolaboratiboan». Halaber, egungo dekretua baliogabetu ostean sortutako egoera ere deitoratu du: «Gure ustez, egoera ziurgabean uzten zituen familiak, ikastetxeak eta hezkuntza sistema».
Itaunaren harira, Pedrosak ihardetsi du «oso pozik» joaten dela azalpenak ematera Eusko Legebiltzarrera, lan hori egitea dagokionez gero: «Hezkuntza sailburuak begirunez eta zintzo begiratzen die batzordeari eta legebiltzar honi». Eta adierazi du gaur ere «ziurtasunak» helaraztera bertaratu dela.
«Ez dago inolako ziurgabetasunik, ez dago segurtasun faltarik. Ez dio eragiten momentuan indarrean dagoen matrikulazio prozesuari»
BEGOÑA PEDROSAEusko Jaurlaritzako Hezkuntza sailburua
Dekretuaren baliogabetzeaz aritzean, denboran atzera egin du, 2009ra; dekretu hura berritu zuen 2023ko otsailaren 28koak. Bi arrazoi eman ditu nagusiki: jaiotze tasaren jaitsiera eta atzerritar jatorriko ikasle gero eta gehiago jasotzea. Dekretua ez da nolanahikoa: hartan jasota daude, besteak beste, ikasleak onartzeko prozesuaren nondik norakoak, eskola mapa, ikastetxeen ikaspostuen eskaintza...
Beste dekretu baterako bidea
Argitu du epaileek atzera botatako dekretua «zubi bat» izan zela 2009ko dekretuaren eta arau berrietara —Espainiako Gobernuaren LOMLOE legea eta EAEko Hezkuntza Lege berria— egokituko den beste baten artean; orain, bidea zabalik dute beste dekretu hori ontzeko. Pedrosaren arabera, espero dute pronto egotea urtea amaitzerako. Bitartean, ziurtatu du ez dagoela «ziurgabetasunik» EAEko Justizia Auzitegi Nagusiaren epaiagatik: «Ez da irmoa; helegitea jarri dugu». Eta eskatu du ez jarduteko «beldurraren politikan»: «Erantzukizuna eta kohesioa eskatzen ditugu».
