PCR probaren eguna Baionan

Glain aparkalekuaren ondoan, 10:00ak dira. Errobi ibai bazterrean, haize hotzaren eta lanbroaren artean, 150 metroko jende lerro batek elkarteen etxera sartzea goaitatzen du. Eskualdeko Osasun Agentziak PCR proba leku bat plantan ezarri zuen atzo goizean Baionan, 09:00etatik 11:30era. Edonor bil zitekeen, urririk proposatu baitu detekzio kanpaina.

Fritz Langen Metropolis filmeko langileak bezala, gorputzak emeki doaz proba lekura, urratsez urrats, lerro zuzenari segika. Beldurra ageri da, maskarak soinean dituzten arren. Azken egunotan, Euskal Herrian COVID-19 gaitzaren emendatze handi bat gertatu da. «Ohartu gara jende anitz gurutzatu genuela, eta arriskua bazela eritasunak hunki gaitzan», dio itxaroten ari den bikote batek. «Bakantzetara etorri gara Euskal Herrira», gehitu dute. Konfinamenduak kaleak hustu ondotik, udak ditu, anitzetan ez bezala, berriz bete.

Bi lagun isil-isilka aitzinatzen dira, kezkaturik. Bi aste pasatu dituzte bakantzetan Lapurdiko kostaldean, eta bihar Frantziara sartuko dira. Azken egunetan sentitu dute eritasunarekiko kezka. Etxera sartu aitzin proba egin nahi dute: «Badaezpada, ez dezagun etxera eritasuna ekar. Positibo ematen badugu, hamalau eguneko konfinamendua eginen dugu». Lehen aldia da proba egiten dutela. «Ez dakigu berriro eginen dugun ala ez. Ikusiko nola aldatzen den egoera. Ni, adibidez, jendeekin kontaktuan naiz lanean; orduan, beharbada, proba berriro egin beharko dut», dio emazteak.

Elkarteen etxe aitzineko karpa zuri handiaren barnean, osasun langileek mekanikoki ehunka jenderi egiten diote proba, saileanlanean ariko balira bezala. Maskaratuak diren ehunka pertsonaren bisaiak lehen aldiz ikusten dituzte kautxuzko eskularruen artean pasatzen direlarik. 24 eta 48 ordu artean iritsiko zaizkie emaitzak.

Karpa zuritik atera da Baionako gizon bat, bere lagunarekin. Haien adiskide batek proba egin zuen: emaitza positiboa. Hala, hurbileko guziak proba egitera joan dira. «Posible balitz, odolarekin egiten duten proba eginen genuke, jakiteko eritasunak jadanik hunki gaituen ala ez», adierazi dute. Biek egin dute testa 10:30 inguru. «08:30ean iritsi gara, lerroan goaitatu dugu bi orduz, proba egin dugu duela hamar minutu. Aski laburra da, sudurretik hari bat pasatzen dute lagin baten lortzeko», azaldu du gizonak.

Lerroa osatzen duten azkenetan, familia bat. Gurasoek lehen aldiz proba eginen dute; alabak beste bi egin ditu, dagoeneko. Amak zintzurreko mina du goizetik. Sintomak familiakoak beldurtu ditu, eta denak etorri dira proba egitera. «Positibo ematen badugu, hamalau egunez etxean egonen gara. Ikusiko zein diren neurriak. Espero dugu ez dela konplikaziorik izanen». Ikusita zenbat jende bildu zen atzo goizean, ez zuen lekua segurtatua familiak. Horiek bezala, jende askok ez du proba egin ahal izan, lerroa luzeegia baitzen. 11:30ean hetsi dituzte ateak.

Eskualdeko Osasun Agentziak ber lekuan probak berriz eginen ditu datorren ostiralean,14:00etatik 16:00etara. Aurreikusten da jende anitz bilduko dela berriro, nahiz eta sasoi turistikoaren bukaera hasten den.