Gasteizko Udalak salatu duenez, kaputxadun batzuek Palestinako bandera erraldoi bat margotu zuten atzo Tuvisa konpainiako autobus batean. Atzo arratsaldean izan zen, 19:30 aldera, Zalduondo kalean, Gasteizko Goikolarra auzoan. «Antza denez, dozena bat gazte inguruk, burua estalita eta beltzez jantzita, ibilgailua gelditu zuten, eta gainerakoek Palestinako bandera margotu zuten autobusaren albo batean», adierazi dute udaleko iturriek.
Tuvisa konpainiak abisu eman zion Udaltzaingoari, eta, ondoren, Agirrelandako kotxetegira eraman zuten ibilgailua, garbitzeko. Gasteizko Udalak «erasoa» gaitzetsi du, eta gaur bertan aurkeztuko du salaketa Polizian.
Beatriz Artolazabal Espazio Publikoko eta Auzoetako zinegotziak gertatutakoa gaitzetsi du X sare sozialean, eta herritarrentzat «kostu ekonomikoa» duela gogoratu. «Autobusak zerbitzu publikoko espazioak dira, ez aldarrikapenerakoak», erantsi du.
