Pablo Gonzalezen espetxealdia hiru hilabetez luzatu du Poloniak

Urtebete igaro da Poloniako Poliziak Pablo Gonzalez euskal kazetaria atxilotu eta espetxeratu zuenetik, eta Poloniako auzitegi batek atxiloaldia hiru hilabetez luzatzea erabaki zuen atzo. Maiatzaren 24ra arte izango du preso , RSF Mugarik Gabeko Kazetariak erakundeak jakinarazi duenez. Poloniako justiziak Gonzalez «preso arriskutsutzat» jotzen duenez, baldintza «bereziki gogorrak» pairatu behar ditu espetxean. RSFk salatu du Gonzalezek eskuburdinak eraman behar dituela une oro, ezin dela bere zeldatik atera eta kartzelako funtzionarioek «biluztera» behartzen dutela «egunean zenbait aldiz».

Gainera, RSFk salatu du astean behin dutxatzeko aukera baino ez duela izan Gonzalezek. Bere atxiloaldia «ahalik eta azkarrena» amaitu behar dela adierazi du erakundeak, eta ez da bakarra izan. Urteurrena baliatuta, AI Amnesty International erakundeak kezka adierazi du Gonzalezen bakartze egoeragatik, eta hura askatzeko eskatu du. Poloniako fiskal nagusiarengana jo du horretarako, baina ez du haren erantzunik jaso.

Ukrainaren eta Poloniaren arteko mugatik kilometro gutxira atzeman zuten Gonzalez, iazko otsailaren 27an. Ukrainako gerrak eragindako errefuxiatu krisiaren berri ematen ari zen eremuan. Poliziak, baina, Errusiako zerbitzu sekretu militarrentzat lan egitea leporatuta atxilotu zuen. Orduan, hiru hilabeteko behin-behineko espetxealdia ezarri zioten, baina hura luzatuz joan da Rzeszowko Auzitegia.

Egun, Gonzalezek badu harremana bere abokatuarekin —Gonzalo Boye—, eta Espainiako Estatuak Polonian duen kontsulak bisitatu izan du. Halere, Amnesty Internationalek salatu du irregulartasunak nabari direla prozesuan; besteak beste, atxiloaldiko lehen hamasei egunetan ez zuen ezein ofiziozko abokatuk bisitatu, eta bi hilabete igaro arte ezin izan zuen abokatu bat aukeratu.

Horiek prozesu bermedun baten aurkako erabakiak direla gehitu du erakundeak, eta, beraz, Giza Eskubideen Europako Hitzarmenaren kontrakoak.