EH Bilduko koordinatzaile nagusi Arnaldo Otegik adierazi du «era diskretuan» egin dutela lana alderdien artean, estatus politikoaren inguruan akordio bat erdiesteko. Euskadi Irratian egindako elkarrizketa batean, koalizio abertzaleko buruak esan du ez duela ukatzen Andoni Ortuzarrek esandakoa, alegia, «aurreratu» egin dela estatusaren edukian. Haren arabera, «aukera leihoa orain dago», Madrilen Sanchezen gobernua dagoela aintzat hartuta. EAJko presidente izendatu ondoren egindako lehen elkarrizketan, Aitor Estebanek zuhurtzia mezu argia bidali du estatusari buruz galdetu diotenean, «Madrilen gehiengoak aldakorrak» direla gogoratuta. Bada, Otegik gaur argi esan du «zuhurtzia bai, baina anbizio nazionala» ere behar dela garai politiko honetan.
EH Bilduko buruak azaldu du koalizio subiranistak ez duela bakarrik EAJrekin hitz egin. PSE eta PSN aipatu ditu, Nafarroa ekuazioaren barruan sartuta: «Mundu guztia konturatu da garai historiko honetan urrats bat egin behar dela nazio ikuspegia aintzat hartuta», ziurtatu du. Halaber, balioa eman nahi izan dio PSE-EEko idazkari nagusi Eneko Anduezak berak esandakoari: «Mundu guztia ados dago honetan: nazio bat gara». Otegik uste du «hortik» hasten dela «bide bat». Euskal Herriaren «nazio aitortza» nola egiten den «termino politiko eta juridikoetan», hor dago gakoa, EH Bilduko buruaren esanetan. Eta horretan aurreratu egin dela baieztatu du.
«Orain da garaia», nabarmendu du koalizioko buruak, eta Ortuzarri erreparatu dio: «Ortuzar zegoenean oso argi genuen ez daukagula denbora mugagabea urratsa egiteko. Garrantzitsuena lehenengo urratsa da: Euskal Herrian akordioa sustatzea». «Herri gisa» dauden erronkak kontuan hartuz egin behar da akordioa, Otegiren arabera.
Oreka eta anbizioa
Estebanek ez du mezu baikorrik eman estatus berriak Madrilen izan ditzakeen aukeren inguruan, baina esan du dauden aukerak baliatuko dituztela. «Bidea oso luzea izango da, eta ez dugu obsesionatu behar», ohartarazi du. EH Bilduko buruak gogoratu du EBBko presidente berriak 21 urte egin dituela Madrilen, eta badakiela zertaz ari den estatus berriaren inguruan egongo diren zailtasunak azpimarratu dituenean, baina horretarako garaia «orain» dela errepikatu du. Madrilen sor daitezkeen zailtasunak aipatzeak ez dio «motibazioa» kentzen Otegiri. «Nik uste dut zuhurtzia eman nahi diola egoerari, eta hori beti ongi dago», esan du koalizioaren buruak. Baina, segidan, argi utzi du EH Bilduk «anbizioz» heldu nahi diola egoerari. «Oreka egon daiteke, baina anbizioz», zehaztu du.
Eta ziurtatu du eurek «beste abiapuntu bat» dutela, Estebanen EAJrekin alderatuta: «Guk ulertzen dugu EAJ. Demokrazia kristauaren parte izan da historikoki, oso europazalea betidanik. Baina uste dugu haiek hizpide duten Europa hori desagertu egin dela. Orain ematen du estatalizazioaren alde egiten dutela».
«Bi familia abertzaleon lidergoan gaude [Esteban eta Otegi]; herri honen interesak defendatzeko, ondo konpondu behar dugu, bai ala bai»
ARNALDO OTEGIEH Bilduko koordinatzaile nagusia
Estebanekin duen harremanaz ere galdetu diote. «Bi familia abertzaleon lidergoan gaude», esan du; «herri honen interesak defendatzeko, ondo konpondu behar dugu, bai ala bai». Aipatu du Madrilgo Kongresuan lehia bat dutela orain EAJk eta EH Bilduk, baina, egoera horretatik harago, uste du Madrilen «herri gisa aritzea hobea» litzatekeela abertzaleentzat, eta gai batzuen inguruan «defentsa komuna» egin. «Ez da posible izan, baina guretzat ez du zentzu handirik boz horiek lehia esparru bezala hartzeak». Zergatik? Otegiren azalpena: «Lurralde zatiketa gainditu egiten da hautetsontziak jartzen dituztenean, zeren eta Nafarroa Garaian ere jartzen dituzte, eta horrek aukera ematen digu gutxiengoen akordio bat egiteko».
