AET Administrazioan Euskaraz Taldeak ohar baten bidez salatu du Nafarroako Gobernuko Lurralde Kohesiorako kontseilari Oscar Txibiteren portaera euskararen erabilera arautzen duten lege irizpideen kontrakoa dela. Halakoetan tematuta egotea egotzi diote, «gurpil zoro» batean jardutea. Izan ere, elkarteak esan du iazko ekainean Nafarroako Arartekoak hainbat gomendio helarazi zizkiola Txibiteri, eta adierazi ziola N-121 errepidean, bai eremu euskaldunean eta bai eremu mistoan, euskara ere erabili behar zela errotulazioan. Kontseilariak orduan erantzun zuen gomendio horiek aintzat hartuko zituela, baina AETko kideek orain salatu nahi izan dute muzin egin ziela aholku horiei: hain justu ere, azaldu dute irailean Belateko tunelak itxi zitutenean gaztelania hutsean jarri zituztela hainbat seinale.
Adierazi dutenez, oraingo salaketaren abiapuntua Donamariako herritar batek jarritako kexa da. Arartekora jo zuen hark ere. Eta Txibitek emandako erantzuna salagarria iruditzen zaie AETko kideei. «Saiatu da berriz ere juridikoki jusitifikatzen ez dagoela behartua seinaleak ele bitan jartzera», azaldu dute. Baina gogoratu dute arrazoibide horiek bide aski motza dutela: «Arartekoak aurreko kexetan jada desmuntatu zizkion argudio horiek».
Salatu dute PSOEk euskararen gainean duen jarrera dagoela halakoen atzean: «Berriz ere euskaldunoi adarra jotzen».
