Osasun sistemaz «manipulazio mediatikoa» egitea egotzi diote Sagarduiri

OPA plataforman baturik, osasun publikoaren aldeko taldeek Eusko Jaurlaritzaren Osasun Sailaren «kanpaina mediatikoa» salatu dute: «Gotzone Sagardui sailburuak ukatu egin du euskal herritarren eta osasun arloko langileen ezinegona, eta 'ingurune soziopolitikoari' egotzi dio». Sailburuak «lankidetza publiko-pribatuari» buruz esandakoak ere kritikatu dituzte. Horiek horrela, azaroaren 11n osasun publikoaren alde egitekoak diren mobilizazioetan parte hartzera deitu dute: Donostian, Bilbon eta Gasteizen egingo dira.

Plataformak aditzera eman duenez, «propaganda plan hutsa» egiten ari da Jaurlaritza, herritarrak «nahasteko eta engainatzeko» pentsatua: «Propagandaren bigarren helburua osasunaren negozioarekin irabaziak lortzen dituzten enpresen aldeko eraispen progresiboaren ondorioak estaltzea da». Zenbait adibide jarri dituzte: «Iraunkortasunaz hitz egiten dutenean, murrizketak egiteaz ari dira benetan; enplegua sortzeaz mintzatzen direnean, enplegu publikoa suntsitzeaz ari dira, enpresa pribatuetan postu prekarioak sortzeko; hobekuntza teknologikoak aipatzen dituztenean, arreta prekarioa emateaz eta eten digitala handitzeaz ari dira; lankidetza publiko-pribatua aipatzen dutenean, esan nahi dute osasun pribatua diru publikoarekin finantzatu nahi dutela, osasun publikoa ahulduta, pribatizazioaren beharra justifikatzeko».