"Gizartearen normalizazioa lortzeko prozesu gradualari ekarpen bat" egin nahi izan dio Joxe Mari Kortaren Bidetik fundazioak, eta aurrerantzean ez dute egingo hilketaren urteurreneko omenaldirik. Andoitz Korta semeak eta Jexux Mari Mujika eta Jesus Alberdi fundazioko bozeramaileek iragarri dute erabakia, "terrorismoaren amaierak" ekarritako "egoera berria" aintzat hartuta.
Hala ere, zehaztu dute fundazioak ez diola uko egingo Kortaren memoriari, ezta beren iritzia zabaldu eta indarkeriaren beste biktima batzuen omenaldietan edo ekitaldi instituzionaletan parte hartzeari. Hala, enpresariaren eta fundazioaren balioak sustatzen jarraituko dutela adierazi dute: "Zintzotasuna, ahalegin pertsonala, elkarrizketa eraikitzailea, humanismo solidario eta konprometitua, herriarenganako maitasuna...".
"Ekarpen ausarta"
EAko idazkari nagusi Pello Urizarren iritziz, "ekarpen ausarta" da Kortaren Bidetik fundazioak egindakoa: "Abuztuaren 8an zuloa izango dugu agendan, baina Joxe Mari Korta memorian".
