Desobedientziaren bidea hartzeko prest agertu ziren Seaskako irakasle eta ikasleak, azterketak euskaraz pasatu ahal izatea aldarrikatzeko. Bada, kolegioko hirugarren mailako ikasleek atzo arratsaldean bukatu zuten brebetako proba, eta desobedientziaren bidea hartu zuten: ikasleek euskaraz itzuli dute zientzietako azterketa, ikuskaritzak frantsesez egitea derrigorrezkoa dela berretsi arren. Kopiak euskaraz zuzendu ditzaten eskatzeko, 200 lagunek Donapaleuko (Nafarroa Beherea) Amikuze kolegioa okupatzea deliberatu zuten. Bi egunez egonen dira han. Izan ere, Amikuzen daude Larzabaleko (Nafarroa Beherea) Seaskako kolegioko ikasleen kopiak, zuzentzaileei banatzeko. Ikuskaritzak, ordea, agindu du euskarazko kopiak irakasle erdaldunei ematea, aurreko urteetan bezala. Beraz, irakasleak han egonen dira azterketak «Euskal Herrian zuzentzen direla bermatzeko», Elorri Falxa irakasleak berretsi zuenez: «Gure egonaldiaren xedea da kopiak euskaraz zuzendu ditzatela aurten, eta geroan ere bai».
Oraino ez dakite noiz etorriko den ikuskaritzako langilea kopien bila, baina ostegunerako zuzenduak izan behar dute. Anartean, kolegioko atarian egonen dira Seaskako irakasleak, ikasleak eta gurasoak. Okupazioaren ondotik, manifestazioa eginen dute Donapaleun bihar 18:00etan, Azterketak Euskaraz! lelopean. Baxoa euskaraz pasatzea ere galdetu dute: filosofiako proba hala egin dute ikasle batzuek.
Okupatu, egoera askatzeko
Seaskako ikasleek eta irakasleek mobilizatzeari ekin diote brebeta bukatu bezain laster. Zuzenketa gune den Donapaleuko kolegioa okupatu dute, kopiak euskaraz zuzendu ditzatela galdegiteko.
Iruzkinak
Ez dago iruzkinik
Ordenatu
