Ohartarazi dute arriskuan egon daitekeela Arabako kontzejuen etorkizuna

Espainiako Gobernuak egin asmo duen administrazioaren erreforma aplikatuz gero, Arabako kontzejuen etorkizuna arriskuan egon daitekeela ohartarazi du Javier Argotek, Arabako Kontzejuen Elkarteko presidenteak. «Arabako kontzejuak estatukoekin parekatzen ditu. Espainiako Gobernuak asmo argia du erreforma honekin: administrazioa uniformatzea eta zentralizatzea».

Hori ikusirik, neurriak hartzeko eskatu dio Arabako Foru Aldundiari. «Espero dugu jakingo duela bere eskumenak defendatzen eta kontzejuak Espainiako Gobernuaren erabakien eta nahien menpe ez uzten». Izan ere, Argotek gogorarazi du kontzejuek aspalditik dutela independentzia administratibo eta ekonomikoa. «Herritarren artean oso errotuta daude, haientzat ezinbestekoak diren zerbitzuak kudeatzeaz eta eskaintzeaz arduratzen baitira. Halaber, ezinbestekoak dira Arabako nekazaritza guneei eusteko. Estatuarentzat, gainera, ez dute inongo kosturik».