Oari ez diote lurralde debekua kendu, eta familiatik banatua segituko du

Oier Oa ez da Larresorora (Lapurdi) itzultzen ahalko. Parisko Zigor Auzitegiak erabaki du ez diola kenduko Frantziako Estatuan egoteko debekua, euskal preso ohiak BERRIAri jakinarazi dionez.Egoera aztertu, eta ondoko egunetan erabakiko dute zer urrats juridiko egin Oak eta haren defentsak. Anartean, emaztearengandik eta semeengandik banatua segitu beharko du oraindik. Kasu deigarria da euskal preso ohi horrena. Urteak daramatza eskatzen ken diezaiotela Frantziako Estatuan egoteko lurralde debekua, baina behin eta berriz ukatu diote.

Bakegileek erran dute erabakia «onartezina» dela. «Oier Oak eskubide osoa du bere familiarekin Larresoron bizitzeko», adierazi dute sare sozialetan, eta deitoratu dute Frantziako botere publikoek ez dutela «inolako jarrera aldaketarik» erakusten. Horren adibide da, haien iritziz, Oari buruz hartu duten erabakia. Adierazi dute «indarrak bildu» behar direla «gauzak aldatzeko», eta urtarrilaren 8an Baionan eginen duten manifestazioan parte hartzera deitu dute. Izan ere, Frantziako Gobernuak gatazkaren konponbidean urratsak egin ditzan, «mobilizazio fase berria» abiatuko dutela iragarri zuten, larunbatean egin zuten agerraldi jendetsu batean, eta manifestazio horretan eman nahi diote abiapuntua.

EH Baik ere salatu du Parisko Zigor Auzitegiaren erabakia. «Iraganari kateatu nahi gaituzten neurriekin bukatu behar da. Preso eta iheslari ohiei aplikatzen zaizkien salbuespeneko neurriak bukatu behar dira, eta Euskal Herrian bizitzeko eta lan egiteko eskubideak errespetzea eskatzen dugu», adierazi dute.

Atxiloketak eta zigorrak

2012ko otsailean atxilotu zuen Oa Frantziako Poliziak, Angelun (Lapurdi), eta, lau urteko espetxe zigorra beteta, 2015eko uztailean aske gelditu zen. Frantziako lurraldean bizitzeko debekua eman zioten orduan. Bi aldiz eskatu zuen kentzeko, familia Lapurdin zuela argudiatuta, baina epaitegian ez zioten ontzat eman eskakizuna. Hasieran, Donostian bizitzen gelditu zen, baina laster Larresorora itzultzea erabaki zuen, familiarekin bizitzera. «Familia bizitza oso pisutsua bilakatzen ari zen. Normaltasunez elkartzeko ezintasun horrek anitzetan eragiten zuen espetxean nengoenean baino antsietate eta ezinegon handiagoa. Denok bareago eta seguruago egoteko, Donostiatik Larresorora joatea erabaki genuen, arrisku guziak geure eginez», esplikatu zion BERRIAri elkarrizketa batean.

Urteetan bizi izan da horrela, iazko azaroan atxilotu zuten arte. Bernat Etxepare lizeoko barnetegian ari zen lanean, zaindari gisa, baina egun hartan ez zen lanera iritsi. Larresorotik Baionara bidean, errepide kontrol batean gelditu, eta, Frantziako Estatuan bizitzeko zuen debekuaren ondorioz, komisariara eraman zuten. Biharamunean gelditu zen aske. Bere egoera konpondu bitartean, Zugarramurdin (Nafarroa) bizi da, lagun batzuek utzitako etxe batean.

Martxoan, hitzordua izan zuen Baionako prokuradorearen bulegoan, eta hark zigor proposamena egin zion: lau hilabeteko espetxe zigorra, gibelapenarekin, debekua urratzeagatik. Oak ez zuen onartu, eta, beraz, epaitua izan beharko du. Otsailean du zita Baionako auzitegian.