Normaltasunak hartu du gaina

Ipar Euskal Herriko eskola, ikastetxe, lizeo eta unibertsitateko ikasle guziek atzo goizean egin zuten sartzea, pandemiak ekarri dituen baldintza berezietan. Baionako Estitxu Robles ikastetxean, gurasoak eta ikasleak hesiaren kanpoaldean zeuden 08:00etatik, zain. Zakua bizkarrean, lagunarteko kalakan aritu dira nerabeak klasera sartu aitzin. Gurasoak begira, seme-alabak baino urduriago. Urteroko irudia izan zitekeen, baina maskarek ikasle berrien aurpegiak kukutzen dituzte.

Frantziako Hezkuntza Ministerioak maskarak derrigortu ditu 11 urtetik gorakoentzat, ikastetxe guzietan; eta pandemiak aldatu egin du sartze eguneko argazkia ere. 08:30ean ireki dute xeila, eta hasi dira ikastetxera sartzen, lerroan. Protokoloa dela eta, eskuak desinfektatu behar izan dituzte haurrek ikastetxera sartu aitzin. 6. mailakoak sartu ziren atzo goizean: gainerakoek gaur dute sartzea. Seigarrenekoek lehen aldia dute kolegioan, eta egun bateko tartea izan dute «handiak» ezagutu aitzin.

Jasmine xeilan zegoen zain, amaren ondoan. «Kontent naiz kolegiora sartzearekin, nire lagunak ere etorriko direlako. Baina maskararekin pixka bat beldurtua naiz, bero handia ematen dutelako». Korrika eskapatu da neskatoa, lagun mina hurbiltzen ikusi duelarik, eta besarkatu du.

Ondoko ikasle taldean daAloña, eta bat egin du Jasminekin. «Joan den urte bukaeran ikastolan ez zen beharrezkoa maskara. Baina orain beharko dugu ohitu», erran du. Protokoloak lagunekin jostatzeko manera aldatu izana deitoratu du Jonik: «Gu beti ari gara jostetan elkar hunkituz, eta usu besarkatzen ditut ene lagunak. Biziki zaila da metro bateko distantzia atxikitzea gure artean». Hala ere, «pozik» daude Aloña eta Joni, kolegioko abentura hasteaz. «Neguan ongi izanen da, sudurrean hotz badugu, maskararekin berotzen ahal gara», bota du Aloñak, eta lagun guziak hasi dira irriz.

Irakasleak, kezkatuago

Gaelle Blanco euskara irakaslea izanen da ikastetxean; eta berak ere, lehen eguna zuen atzokoa. Urduri mintzatu da: «Pentsatzen dut urte berezia heldu zaigula. Entseatuko gara ahal bezain ongi egiten, arauak errespetatuz. Ez dakigu norantz joango garen». Bat egin du harekin Mañolo Ezpeleta zuzendariak. Osasun egoera aldatu ahala, protokoloak ere alda daitezkeela azaldu du. Baina, haren irudiko, hutsuneak baditu neurri sortak: «Epe batzuk finkatu beharko lirateke. Adibidez, hiru astez protokolo bat saiatzen ahalko genuke, eta emaitzaren arabera, aldatu: hobera edo txarrera. Ez dakigu zein diren irizpideak; eskerrak talde azkarra dugula kolegioan, eta egokitzeko gaitasuna dugula».

Lore Aroztegi ikastetxeko hezkuntza aholkularia da, eta sartzerako protokolo berezia landu zuen udan zehar: «Bakantzak aitzin, zerbait prestatu genuen, baina Frantziako Hezkuntza ministroa berriz mintzatu da joan den astean. Azken finean, aldaketak egin behar izan ditugu azken momentuan. Erran duena ez da beti argi, eta saiatu gara moldatzen gure lekuaren eta egoeraren arabera».

Heldu dira 09:00ak, eta sartze eguneko aurkezpena egin dute kanpoko eremuan. Ongietorria egin diete irakasleek ikasleei; eta klaseak osatu dituzte. Sartzeko momenturik estresagarriena ikasleentzat; lagun taldeak nola banatuko ote dituzten. Baina gehienak pozik agertu dira, eta irakasle arduradunak segitu dituzte klasera sartzeko. Hasia dute ikasturtea; eta egoera berezia izanik ere, normaltasunak hartu du gaina.