Noaingo (Nafarroa) gas eztandan zauritu ziren gehienak etxean dira jada, sendagiria jasota. Orotara bederatzi lagun artatu zituzten astelehenean, deflagrazioak eragindako zauriengatik, gas toxikoa arnasteagatik edo antsietate koadroengatik. Horietatik bi herriko osasun etxean artatu zituzten, eta gainerako zazpiak, berriz, Nafarroako Ospitale Unibertsitariora eraman. Bi pertsonak biharamunean jaso zuten sendagiria, zauriak ondo sendatzen ari zitzaizkielakoan; atzo iluntzean, beste bi atera ziren erietxetik. Hortaz, hiru lagun daude oraindik orain Nafarroako Ospitale Unibertsitarioan: 22 urteko gazte bat zaintza intentsiboko unitatean, 49 urteko emakume bat traumatologia unitatean eta 13 urteko neska bat. Neska gaur eraman dute ZIU pediatrikotik gela arrunt batera.
Nafarroako Gobernuko Osasun Departamentuaren arabera, zaintza intentsiboetan gaztea «larri» dago, baina egonkor. Arriskutik kanpo, alegia. Traumatologia unitatean ospitaleratua dagoen emakumea ere egonkor da.
Eztandaren lekuko izan ziren bizilagun askori arta psikologikoa ere eskaini zieten han bertan.
