Nafarroako Gobernuak Euskarabidearen eta Navarra Television telebista kate pribatuaren arteko akordioaren berri eman zuen atzo. Hitzarmen horren eskutik, Euskarabideak telebista kate horren bi programa itzuliko ditu euskarara: Enfoque (Ikuspegia) eta No te pares (Mugi zaitez). Euskarabideko zuzendari kudeatzaile Maximino Gomezek eta Navarra Televisioneko zuzendari Roberto Camarak sinatu zuten akordioa.
Atzo sinatu zuten, baina Euskarabideko itzultzaileak joan den urriaren bukaeratik ari dira Navarra Televisionerako lanean, BERRIAk jakin duenez. Akordioak jasotzen du ez dagoela «inolako konpromiso ekonomikorik» bi aldeen artean. Edozein modutan, Euskarabideko langile publikoak aritu dira eta arituko dira enpresa pribatu batentzat itzulpenak egiten.
Gobernuak hitzarmenari buruz plazaratu duen prentsa oharraren arabera, bada aukera Navarra Televisioneko programa gehiago itzultzeko. Euskarabideak itzulitako saioek, hain zuzen ere, Nafarroako Gobernuaren logotipoa erakutsi beharko dute. Gobernuak, gainera, itzulitako programen kopia jasoko du, «euskara irakasteko erabili ahal izateko».
Euskaraz ari diren hedabideak, hau da, euskara hutsean lan egiten dutenak, dirurik gabe utzi ditu aurten Nafarroako Gobernuak. Canal4 , Canal6eta Popular Television telebista kateentzat, berriz, 2,5 milioi euroko diru laguntza onartu zuen. Canal4 katea itxi egin zuten geroztik, eta Canal6 eta Popular Televisionek bat egin zuten, Navarra Television sortzeko.
Navarra Televisionentzat lanean ari da Euskarabidea
Erakunde publikoak atzo sinatu zuen kate pribatuarekin akordioa itzulpenak egiteko, baina urritik egiten ditu
Iruzkinak
Ez dago iruzkinik
Ordenatu
