Nafarroako Gobernua eta EH Bildu, «baikor»

IRUÑEA. Nafarroako Gobernuak eta EH Bilduk bilera izan zuten atzo datorren urteko aurrekontuei buruz hitz egiteko, eta bi aldeak «baikor» agertu ziren bileraren ondotik. Nafarroako Gobernuko lehen lehendakariorde Javier Remirezek esan zuen zenbait arlotan «gertutasun handia» dagoela, eta beste batzuetan jarrerak ez daudela hain hurbil. «Datorren asteartean berriro bilduko gara, eta ikusiko dugu zein gaitan jarrai dezakegun aurrera egiten». EH Bilduko Adolfo Araizek, berriz, esan zuen «adostasun giroaz» gain «zenbait gai zehatzetan sakondu» egin dutela.

Gainera, Navarra Sumaren jarrera txarretsi zuen Remirezek, eta «muturreko oposizioan» kokatzea egotzi zien: «Ez dakit zertan dabiltzan; ez dira seriotasuna eta ardura erakusten ari».