Motorzale bat hil da gaur arratsaldean N-1 errepidean, Villabona (Gipuzkoa) parean. Eusko Jaurlaritzako Segurtasun Sailaren arabera, 15:00 aldera gertatu da istripua; erori egin da emakumea oraindik ikertzen ari diren arrazoiengatik.
Zauri larriak eragin dizkio erorikoak, eta larrialdi zerbitzuek ezin izan dute ezer egin haren bizia salbatzeko.
Errepidea moztuta egon da pare bat orduz, eta lau kilometro inguruko auto pilaketak eragin ditu horrek.
Ez da eguneko ezbehar bakarra izan. Armendaritzen, Nafarroa Beherean, beste emakumezko bat hil da gaur goizaldean. Suhiltzaileek goizaldeko hiruretan izan zuten Iholdi-Oztibarren gertatutako istripuaren berri, eta bertaratu zirenean emakumezkoaren autoa topatu zuten errepidetik irtenda.
Emakumea bizirik atera zuten ibilgailutik, baina handik gutxira hil zen.
