30 urte inguruko moto gidari bat hil zen atzo Ziburun (Lapurdi) izandako moto istripu batean. Ezbeharra atzo arratsaldean izan zen; gizonezko gidaria bidetik atera zen, eta argindar poste bat jo zuen. Itxura guztien arabera, abiadura handian zihoan, eta istripua izan eta berehala hil zen.
Istripua Ziburuko golf zelai inguruan izan zen, Urdazuri ibaiaren alboan. Suhiltzaileak eta larrialdi zerbitzuak istripua gertatu eta gutxira iritsi ziren, baina ezin izan zuten ezer egin gizona sorosteko. Ez zen beste ibilgailurik izan istripuan. Ez da Ziburun horrelako istripu bat gertatzen den lehen aldia. 2021ean eta 2022an beste bi moto gidari hil ziren antzeko ezbeharretan.
