Eric Morvan Pirinio Atlantikoetako prefeta izan zen Bakegileen eta Frantziako Gobernuaren artean zubi lana egin zutenetako bat ETAren armagabetzea gerta zedin. Morvan lekuko gisa aritu zen apirilaren 2an Parisen egin zen epaiketan, eta Sud Ouest-en elkarrizketa egin zioten. Morvanek gertukoa zuen orduko Barne ministro Bernard Cazeneuve, eta haren kabineteburuaren albokoa zen.
Morvanek elkarrizketan adierazi zuenez, Bakegileak berarekin harremanetan jarri ziren aztertzeko prest ote ziren ETAren armak Frantziako Gobernuak har zitzan. Baionako lehen bilera hartara bakarrik joan zela esan zuen: «Oso bakarrik egon nintzen luzaz». Azaldu zuenez, Frantziako Gobernuko gertuko iturriei Bakegileen proposamena helarazi zienean, inork ez zuen esku hartu nahi auzi horretan, hasieran behintzat. Zuzenbidearen ikuspegitik, zalantza asko pizten zizkion ekintza hark, baina berak aurrera egitea erabaki zuen, proposamena interesgarria zelakoan.
Tema horrengatik, gobernuak aurrera egiteko esan zion, eta jakinaren gainean izateko. Bakegileek bermeak nahi zituzten, inor ez zezaten auzipetu armak entregatzeagatik. Ebazteko auzirik zailena hori izan zen, Morvanek zioenez, botere judizialari eskatu behar baitzion «ez ikusi egiteko». Botere judiziala jakinaren gainean jarri zuen, eta apirilaren 8an ez zuten inor atxilotu. Frantziak prozesuan parte har zezan, funtsezkoa izan zen Jean Noel Etxeberri Txetx-ekin eta Mixel Berhokoirigoinekin izan zuen konfiantza. «Konfiantzako eta errespetuzko hartu-emana izan nuen Etxeberrirekin. Errespetua handia nion Mixel Berhokoirigoini ere».
