Morlans auzoko hilketetan «egia osoa» jakitea galdegin dute

DONOSTIA. Duela 30 urte Guardia Zibilak ETAren aurka egindako operazio batean Jokin Leunda, Patxi Itziar eta Iñaki Ormaetxea hil zituen Donostiako Morlans auzoko etxebizitza batean. Atzo «sarraski» hura oroitzeko omenaldia egin zuten haien senide eta lagunek auzoan bertan, hilketak izan ziren lekutik gertu. Ekitaldian aldarrikatu zuten «egia osoa» jakiteko eskubidea dutela: «Egia osoa argitara ateratzea behar-beharrezkoa da, Patxiren, Jokinen eta Iñakiren heriotzen inguruko zehaztasunak argitzea, ezinbestekoa». Horrez gain, Euskal Herrian«ezkutuan» geratu diren «pasarte ilun ugariak» argitzeko exijitu zuten; tartean, zigorgabe geratu diren «jazoera ilunak» edota desagertuta jarraitzen duten euskal herritarren kasuak. Omenaldian nabarmendu zuten egiak argitara ateratzea ezinbestekoa dela «agertoki demokratiko bat» lortzeko, eta «bizikidetza eta askatasuna» eskuratzeko.