Gogora institutuak jakinarazi du Modesto Manuel Azkonaren gorpuzkiak identifikatu dituela. Miranda Ebroko (Burgos, Espainia) Bayas hilerrian zegoen lurperatuta, eta haren biloben DNAri esker lortu dute identifikatzea. 1891ko otsailaren 24an jaio zen Azkona, Alesbesen (Nafarroa), eta Arabako Foru Aldundiko diputatua zela fusilatu zuten frankistek, 1936an.
Fronte Popular ezkerreko koalizioaren partaide zen Azkona, eta Arabako Foru Aldundiko Batzordeko kidea. Hain zuzen ere, batzorde hartako hamabost kideetatik bederatzi hil zituzten tropa frankistek 1936ko irailaren 18an. Horien artean zegoen, besteak beste, Teodoro Olarte Arabako Foru Aldundiko Kudeaketa Batzordeko lehendakaria zena. Bada, efemeride hori baliatuta, Arabako aldundiak egun horretan egiten du urtero frankismoaren biktimak omentzeko ekitaldia.
Haren gorpuzkien bila aritu dira Azkonaren senideak, orduz gero. DNA lagina ere eman zuten Gogora institutuan, eta horri esker lortu dute orain haren gorpuzkiak identifikatzea. Hain zuzen ere, 1936ko gerran senideren bat desagertu zitzaien herritarrei DNA laginak emateko deia egin zien Eusko Jaurlaritzak.