Liskarrean dira munduko botika konpainia nagusietako hiru. Moderna botika etxeak salaketa jarri du Pfizerren eta BioNtechen kontra, bere patenteetako bat urratu izana egotzita. Zehazki, Modernak salatu du bi konpainia horiek ARNm teknologiarekin lotutako patente bat urratu dutela COVID-19aren kontrako txertoa ontzeko.
Modernak 2010 eta 2016 urteen artean erdietsi zuen patentea. «Aitzindariak izan ginen ARNm-aren teknologian, mila milioika dolar inbertitu genituen hura sortzeko, eta COVID-19aren pandemia lehertu aurreko hamarkadatik da gure haren patentea», argudiatu du idazki batean Modernaren zuzendari Stephane Bancelek.
Hala, nabarmendu dute Pfizerrek eta BioNtechek legez kanpo kopiatu zituztela Modernaren asmakizunak; zehazki, diotenez, teknologia horretarako giltzarri diren bi ezaugarri kopiatu dizkiete. Modernaren arabera, bi horiek gabe ez dago ARNm txertoak eraginkorrak izatea erdiesterik.
Patenteen korapiloa
2020ko urrian, izurrite betean, Modernak hitzeman zuen ez zuela patenteekin loturiko salaketarik jarriko, ez trukean deus eskatuko ere; ez behintzat pandemiak iraun bitartean. Ordea, botika etxeak oroitarazi du 2022ko martxoan konpromiso hori eguneratu zutela. Orduan argitaratutako txostenaren arabera, Modernak esan zuen ez zuela salaketarik jarriko herrialde pobretuen kontra, –COVAXek ondutako zerrenda hartuko zuen aintzat hori zehazteko–.
Ordea, AEBetako Pfizer eta Alemaniako BioNtech ez dira zerrenda horretan ageri. Hortaz, Modernak esan duenez, espero zuten bi botika etxeek «aldaketak» egitea jarduteko eran. Kontrara, Modernak salatu du «inolako baimenik gabe» segitu dutela patentea urratzen. Edonola ere, zehaztu du jarritako salaketek soilik 2022ko martxotik aurrerako ekintzak hartuko dituela aintzat.
