LAB, Steilas, ELA eta CCOO sindikatuek iragarri dute segida emanen dietela Araba, Bizkai eta Gipuzkoako eskola publikoetako greba eta mobilizazioei, lan itunak berritzeko xedez. Iragan urtarrilean abiatuta, hamabi lanuzte egin zituzten irakasleek, Haurreskolak partzuergoko hezitzaileek eta sukaldeetako eta garbiketako langileek. Lau sektore horietatik hiruk eutsiko diete mobilizazioei aurrerantzean ere —otsailean, Haurreskolak partzuergoan lan hitzarmena adostu zuten LABek eta Jaurlaritzak—.
Sindikatuek helburutzat jo dute hezkuntza publikoaren kalitatea bermatzea, eta inbertsioa handitzea galdegin diote administrazioari. Bihar goizean emanen dituzte mobilizazioei buruzko xehetasunak.
