Mikel Zabalzaren omenez hainbat ekitaldi egingo dituzte datozen asteetan

Guardia Zibilak atxilotu eta inkomunikatu ostean Mikel Zabalzaren gorpua Bidasoa ibaian agertu zeneko 25. urteurrena da, eta Amnistiaren Aldeko Mugimenduak hainbat ekitaldi antolatu ditu gertatua gogora ekarri, argitzeko eskatu eta Donostiako Probintzia Auzitegiak auzia artxibatu duela salatzeko. Izan ere, AAMk ez dauka dudarik: «Mikel torturaren ondorioz hil zen, Mikel torturak hil zuen». Joan zen astean jakin zen Donostiako Auzitegiak Zabalzaren auzia artxibatu zuela, eta, AAMren ustez, «berriz ere torturatzaileen zigorgabetasuna atera da garaile epaitegietan. Berriz ere agerian geratu da torturaren inguruan eraikia duten egitura osoa eta epaitegiek egitura oso horretan betetzen duten tokia».

Tortura amaitzeko, presio soziala beharrezkoa dela berretsi du AAMk, eta mobilizazioak antolatu ditu. Hitzaldiak emango dituzte, hilaren 20an manifestazioa egingo dute Donostian, eta 27an ekitaldia Orbaizetan.

25 urte geroago «errepresio egoerak» berdin jarraitzen duela salatu du AAMk, eta Jon Anzaren auzia ere argitzeko dagoela ekarri du gogora.