Mikel Barrios euskal presoa aske utzi dute, eta gaur aterako da Mont-de-Marsango espetxetik. Ekainean sartu zen espetxera, bost urteko kartzela zigorrera kondenatuta. Xantiana Cachenaut abokatuak azaldu du Barriosek kontrol judiziala bete beharko duela: astean behin aurkeztu beharko du polizia etxera. Horrez gain, Frantziako Estatutik ateratzeko, baimena eskatu beharko du.
Barrios 2017an atxilotu zuten, Alemanian, Frantziak haren aurka ezarritako euroagindua baliatuta. Osnyko (Frantzia) presondegian espetxeratu zuten, eta handik urtebetera aske utzi, baldintzapean. Ondotik, 2020ko ekainean, Parisko Auzitegiak bost urteko kartzela zigorrera kondenatu zuen. Defentsak dei egin zuen, eta epaiketa azaroaren 12an izango du. Ordura arte kalean izanen da, baldintzapean.
