Euskal Herriko 126 idazlek eta editorek adierazpen bat plazaratu zuten atzo, Eman bakea izenburupean, Mikel Albisu Iriarteri babesa adierazteko. Donostiako Bulebarrean aurkeztu zuten adierazpena, eta agiriaren sinatzaileetako batzuk eta Albisu bera izan ziren bertan. Garbiñe Ubeda Euskal Idazleen Elkarteko lehendakariak irakurri zuen testua, eta Joseba Sarrionandiak eta Garazi Arrula Txalapartako editoreak irakurri zuten sinatzaileen zerrenda. Horiez gain, Bulebarrean izan ziren Jule Goikoetxea, Gotzon Barandiaran, Josu Landa, Jon Alonso, Oier Guillan eta Joxe Austin Arrieta sortzaileak, besteak beste.
[YouTube]https://youtu.be/SWuRDoePzsg[/YouTube]
Elkarretaratuak Albisu bigarrenez epaitzearen kontra agertu ziren. Izan ere, Frantziako Estatuan hogei urteko espetxe zigorra betea du Albisuk, eta duela hiru urte askatu zuten. Orain, ordea, Espainian «berriro ere zigortu» nahi dutela salatu dute: are, Frantzian bete duen zigorraren «arrazoi berdintsuengatik eta inolako froga materialik gabe». Horrez gain, «bere sorkuntza libreki» eskaintzen jarrai dezan nahi dute izenpetzaile guztiek.
