Eusko Jaurlaritzako Segurtasun Sailak emandako datuen arabera, Santiago Aurrera irlan aurkitu dute gorpua, ibaian barrena zihoazen kayakista batzuek,11:00 aldera. Irungo Harrera Sareak zehaztu du zendu den pertsona hori migratzaile bat dela. Gainera, sarekoek emandako informazioaren arabera, beste migratzaile batek ere salto egin du uretara. Bigarren hori bizirik erreskatatu dute, gorpua aurkitu duten ibai ertz berean. 16 urteko gazte bat da. Sarekoen esanetan, uretara salto egin duten pertsona horiek igerian Hendaiara iristea zuten helburu.
Irungo Harrera Sareak elkarretaratze batera deitu du biharko; gorpua agertu den lekuaren inguruan eginen dute,11:30ean. Sarekoek galdegin dute heriotza ez dadila uler «migrazioaren sinonimotzat». Gainera, instituzioei eskatu diete «migrazioaren eta egin beharreko harreraren erantzukizuna» beren gain har dezatela. Adierazi dutenez, nahi dute «eskubideak sistematikoki urratzen dituzten muga horiei irtenbidea aurkitzeko» urratsak egin ditzatela.
