Asteazkenean hil zen Michel Berger, 93 urte zituela. Neuilly-sur-Seine (Frantzia) herrian sortu zen, 1931n. Lanbidez arkitektoa, euskal departamenduaren aldeko aldarrikapenak eraman zituen luzaz. Milafrangako (Lapurdi) auzapeza izan zen 1977 eta 1983 bitarte.
Parisko Arte Ederren Eskolan diplomatu zen, eta, ondotik, arkitekto aritu zen Baionan, 1963tik aitzina. Bertzalde, Milafrangako auzapez zela, 1981ean, euskal departamendua sortzeko elkarteko lehen presidentea izan zen. Hainbat hautetsik osatzen zuten elkarte hori. 2015ean 66 auzapez ohik sinatu zuten Euskal Hirigune Elkargoaren aldeko agirian ere parte hartu zuen.
Lekuko hauteskunde frankotan hautagai aurkeztu zen Berger. 1982an, kantonamenduetako hauteskundeetan etiketarik gabeko taldean sartu zen.1992ko kantonamenduetako hauteskundeentzat, berriz, Mouvement Unitaire Abertzale taldearekin aurkeztu zen. Frantziako Asanblearako hauteskundeetan ere parte hartu zuen. Abertzaleen Batasunarekin aurkeztu zen 1993an, 5. hautesbarrutiko hautagai gisa.
Umila bezain leiala, ohorea izan da zurekin bide egitea. Doluminik sentikorrenak familia eta ingurukoei.
— Anaizfunosas (@Anaizfunosas1) August 8, 2024
Adiorik ez Michel !🌹 https://t.co/z31Eumrs5M
Lurraldearen ekonomiarako ekarpenak egin zituen Bergerrek. Hain zuzen, Hemen Elkartea taldearen sortzaileetarik bat izan zen, 1979an bertako presidente izatera heldurik. Egoitza Angelun du (Lapurdi), eta urte luzaz enpresa ttipiak sortzeko eta garatzeko xedea izan du.
Engaiamendu frankotan izanik ere, 1984an Jean Claude Koko Abeberrik eta Bergerrek berak sorturiko Euskal Herriko Giza Eskubideen Babeserako Batzordeko (CDDHPB) lehendakari izan zen 2000 bitarte. Han, Jakilea berripapera idazten zuen, eta bake prozesuan engaiatu zen.
Militante bat joan zaigu.
— EH Bai (@EHBai) August 9, 2024
Michel Berger, Milafrangako auzapez ohia eta giza eskubideen aldeko militantea zendu da.
Bide lagun izan dugu, besteaz beste, bakearen aldeko engaiamenduan baita ezagupen instituzionalean izan duen inplikazioagatik
Doluminak hurbilekoei 🖤🤍 https://t.co/0biav4WQCL
2013an, Eusko Ikaskuntza-Baiona hiriko Ohorezko Saria irabazi zuten hark eta Marie Claude Bergerrek. Bien ikerketa lanak sariztatu zituzten.
Erreakzioak
Hainbat erreakzio izan dira Berger omentzeko. EH Bai alderdi politikoak «bidelagun» gisa definitu du, «bakearen aldeko engaiamenduan eta baita ezagupen instituzionalean izan inplikazioagatik». Anaiz Funosas Bake Bideko bozeramaileak adierazi du «gizon umila bezain leiala» izan zela. «Ohorea» izan da harekin bidea egitea, Funosasen arabera.
