Emakumeen salerosketaren eta sexu esplotazioaren aurkako operazio bat abiatu dute Espainiako eta Belgikako poliziek elkarlanean, eta Euskal Herriraino iritsi da ikerketa. Operazio horren barruan, poliziak hainbat miaketa egin ditu Belgikako eta Espainiako zenbait herritan, baina baita Barakaldon (Bizkaia) eta Tuteran ere (Nafarroa). Guztira, zazpi pertsona atxilotu dituzte emakumeak prostituziora behartzea leporatuta. Lau biktima ere antzeman dituzte miaketa horietan, eta aske utzi dituzte.
2023. urteko apirilean abiatu zuen ikerketa Belgikako Poliziak: hango etxebizitza batean piztutako eztabaida baten kontura bertaratu ziren agenteak, eta etxe horretan ziren bi emakumek salatu zuten sexu esplotazioaren biktima zirela. Han jasotako informazioak Espainiaraino hedatu zuen ikerketa. Orain, herrialde bateko zein besteko poliziek iragarri dute emakumeen salerosketa sarea desegin dutela.
Espainiako Poliziak berri agentziei adierazitakoaren arabera, talde kriminal horrek iragarkiak jartzen zituen harremanetarako webguneetan, emakumeak sexualki esplotatzeko, eta biktimek irabazten zuten diruaren erdia kentzen zieten. Polizien arabera betiere, sare horretako kide batzuek Belgikan atzematen zituzten emakumeak, eta beste batzuek, berriz, prostituzio iragarkiak argitaratu, bezeroekin tratuak egin eta irabazitako dirua zuritzen zuten Espainian.
