Bart goizaldean izandako ekaitzek kalteak eragin dituzte Mendaroko ospitalean (Gipuzkoa). Larrialdi zerbitzuetako erizaintza guneko sabaia busti du euriak, eta, ondorioz, zentroak zerbitzua itxi du behin-behinean. Zehazki, ura sartu da klimatizazio-zirkuituan, eta horrek eragin du kaltea. Ospitaleko arduradunek zehaztu dute ez dela izan inolako zauriturik eta berehala mugitu dituztela pazienteak zentroko beste zona batzuetara.
Jakinarazi dutenez, espero dute gaurtik astelehenera bitarte zabaltzea larrialdi zerbitzua atzera ere. «Beranduenez, astelehenean lehen orduan martxan». Ordura arte, beste zentro batzuetara bideratzen ari dira, kasuaren arabera; Eibarko Etengabeko Arreta Gunera batzuk –larritasun arineko kasuak–, eta, kasurik larrienak, Donostia Unibertsitate Ospitalera edo Zumarragako Ospitalera.
