Manex Castro inkomunikatuta dauka Ertzaintzak igandetik

Ez senide ez abokatuarekin ez da egon Manex Castro Villabonako gaztea, igande goizaldean Ertzaintzak atxilotu zuenetik. 03:00 aldera atxilotu zuen Ertzaintzak, Villabonan, ETAko kidea izatea egotzita. Atzo goizean jakinarazi zioten senideei inkomunikatuta dagoela, eta ez diete haren egoeraren gaineko inolako informaziorik eman, ez abokatuei, ez senideei. Hala salatu du Amnistiaren Aldeko Mugimeduak.

Ertzaintzak ez du inor inkomunikatu azken hiru urteetan. Ez behintzat, gatazka politikoarekin lotutako atxilotuak, AAMk esan duenez. Lau zergati galdetzen ditu: Zergatik inkomunikatu? Zergatik ez diote uzten abokatuarekin egoten? Zergatik ez esan familiari non eta nola dagoen? Zergatik eduki pertsona bat bost egunez inkomunikatuta?

AAMtik gogora ekarri dute Ertzaintzak torturatu dituztela salatu dutela 200 lagunek. Eta inkomunikatuta deklaratzen dutenen adierazpenak Auzitegi Nazionalera igorri, pertsona horiek epaitu eta zigortu egiten direla. EAJk inkomunikazioaren aurka dagoela esaten duela ekarri du gogora. «Inkomunikazioa erabiltzeko erabaki politikoa hartu izanak erakusten digu Rubalcabaren errepresio estrategian EAJk zein paper jokatzen duen».