Aitor Esteban buru duen EBB Euzkadi Buru Batzarra ari da lehen erabakiak hartzen eta izendapenak egiten. Atzo jakinarazi zuten Maribel Vaquero izango dela jeltzaleen eleduna Espainiako Kongresuan, Estebanen ordez, eta gaur, berriz, ezagutarazi dute zein izango den EBBko idazkaria: Maitane Ipiñazar Eusko Legebiltzarreko parlamentaria. Zuzendaritza berria urrun geratu da parekidetasunetik (hamar gizon eta lau emakume), eta Estebanek, EBBko buru gisa egindako lehen hitzaldian, agindu zuen sustatu egingo zuela alderdiko emakumeak ardura postuetan aritzea. Bada, izendatu dituen lehen bi kargudunak emakumezkoak dira: Vaquero eta Ipiñazar.
Andoni Ortuzarren, Estebanen beraren eta Gipuzkoako jeltzaleen artean adostu zuten EBBko kide izango ziren horien zerrenda, Ortuzarrek bigarren itzuliari uko egin aurretik, zabaldu zenez, eta, gero, batzokietan, militanteek berretsi egin zuten zerrenda hori. Kaleratu dute Ipiñazar Estebanek babestu zuela eta haren gertukoa dela. Vaqueroren izendapena, berriz, Gipuzkoako jeltzaleei egindako keinutzat har daiteke, Xabier Arzalluzen garaitik ez baita egon Madrilen eledun gipuzkoarrik.
Militantzia sendotu
Aurrerantzean Ipiñazarren ardura izango da EBBk onartutako akordioen jarraipena egitea, baita EAJren Urteko Planari eta Balantzeari erreparatzea ere. Halaber, alderdiaren argitalpenak sustatu beharko ditu, eta Nazio Estatutuak prestatu eta proposatu. Izan ere, Atano III.eko batzar nagusian onartutako txosten politikoen artean Erakunde demokratikoa izenekoa dago, EAJren barne arauei erreparatzen diena. Militantzia sendotzeko eta alderdi barruko dinamika berritzeko xedea biltzen da txosten horretan. Bada, orain, Ipiñazarren esku dago helburu horiek arau zehatzetara eramatea, proposamen zehatz bat egon dadin mahai gainean.
Bistan da: Mireia Zarate ordezkatu duen burukidea, Ipiñazar, kide garrantzitsua izan daiteke EBB berrian, Ortuzarren zuzendaritzan Koldo Mediavilla eta Joseba Aurrekoetxea izan ziren moduan. Estebanek EBB sendo bat egituratu nahi du, eta EBBko bozeramailea ere izendatuko du. Joseba Egibarrek izan zuen rol hori Xabier Arzalluz buru zuen zuzendaritzan, baina, ordutik, EBBko eledunaren rola ez da agerikoa izan, batez ere Iñigo Urkulluk alderdiaren lema hartu zuenetik. Orain, ikusteko dago nork egingo dituen bozeramaile lanak, baina, edonola ere, Estebanek argi esan du, bere lehen elkarrizketan, «erakundeek helarazten dutenetik harago» bidaliko dituela mezuak EBBk. Hau da, baliteke EAJren bi buruko formulazioa inoiz baino argiago ikustea aurrerantzean.
Ez alferrik, Ortuzarren EBBren garaian, Eusko Jaurlaritzako lehendakari Urkulluren pisua oso handia izan zen, baita alderdiaren barruan ere, eta Estebanek sendo eutsi nahi dio bere lidergoari, itxura batean Imanol Pradales lehendakariarenarekin batera. Azken batean, Ortuzarrek izendatu zuen Pradales Urkulluren ordez lehendakarigai izateko. «Ez dugu dena erakundeen adierazpenen gain utziko», esan du argi Estebanek, nahiz eta erantsi zuen Pradalesekin batera egingo duela aurrera. Izan ere, datozen orduetan egingo du lehen bilera harekin.
Maitane Ipiñazar Mirandak 33 urte ditu; Arratian jaio zen (Igorre, Bizkaia), eta bost urte egin ditu EAJko legebiltzarkide Eusko Legebiltzarrean. Lan Harremanetako eta Giza Baliabideetako ikasketak egin ditu, eta enpresa pribatuetan aritu zen sei urtez zerbitzu publikoan sartu aurretik.
