Nafarroako Kontseiluaren onespena du gobernuak. Apirilean, Foru Hobekuntzan errepide zaintza Nafarroaren berezko eskumen gisa jasotzeko akordioa hitzartu zuten Iruñeko eta Madrilgo gobernuek. Orain Nafarroako organo aholku-emaile gorenak ondorioztatu du aldaketa hori «bloke konstituzionalaren barruan» dagoela, eta, aldeko iritzia jasota, urratsez urrats, bidea libre dute aurrera jarraitzeko: Nafarroako gobernuaren kontseiluak maiatzaren 15ean onartuko du, eta maiatzaren 23an bozkatuko dute parlamentuan.
Gehiengoa ziurtatuta dago, eta babes zabalarekin aterako da aurrera. Gobernuko hiru bazkideek ez ezik, UPNk ere adierazi du aldeko botoa emango dutela. Dena den, ez da hori azken helmuga izango. Izan ere, handik Madrilgo gobernuari bidaliko zaio, eta, ondoren, Espainiako Gorteetan bozkatu beharko dute aldaketa. PPk gehiengo osoa du Senatuan, eta Kongresuak izango du azken hitza.
Ikusteko dago parlamentuan PPk zer bozkatzen duen. «Oraingoz, ezkutatu egin dute zer asmo duten, edo ez dute aditzera eman», esan du Felix Taberna presidenteorde lehenak.
Uste baino azkarrago
Goizean jaso du ebazpena gobernuak, eta berehala prentsaurrekora deitu du Tabernak. Urtarrilean kalkulatu zuen urte amaierarako espero zuela dena burutzea. Alta, uste baino azkarrago doaz: «Bi gobernuen borondate onak eta erakundeen arteko lankidetzak modua eman dute erreforma azkar, eraginkor eta sendo egin ahal izateko», goraipatu du. Tabernak eskertu egin du kontseilua «oso azkar» ibili izana.
Iazko uztailaren 1ean, indarrean sartu zen Nafarroari trafiko eskumena itzultzeko prozesua, baina, abenduan, Espainiako Auzitegi Gorenak bertan behera utzi zuen transferentzia, dekretu bidez egin zela iritzita. Gorenak argudiatu zuen Nafarroako Foru Hobekuntzan jasota ez zegoen eskumen bat zela, eta eskubide historikoen artean ere ez zegoela. Aitzitik, Nafarroako Gobernuak uste zuen Foru Hobekuntzan eskumena jasota zegoela eta dekretu bidez egin zitekeela; izan ere, aurrekariak bazeuden eta Gorenak berak bide hori baieztatu zuen.
Epai horrek sortutako blokeoa gainditzeko asmoz, Foru Hobekuntza aldatzeko bideari ekin diote. Tabernak nabarmendu du «albiste ona» dela kontseiluaren oniritzia jaso izana, Nafarroako erakunde jurisdikzional gorena delako. Gogora ekarri du prozesua amaitzen denean «hirugarren erreforma» izango dela. Aurreko aldaketak 2001 eta 2010 urteetan egin ziren.
