Maiatzaren 14an izanen da 40. Herri Urrats Senperen

Maiatzaren 14an izanen da 40. Herri Urrats Senperen (Lapurdi), eta Seaskak gaurdanik dei egin die euskaltzale guziei bertan parte hartzera joateko. Atzo aurkeztu zuten, Baionan. Aurtengo dirua Seaskaren bosgarren kolegioa laguntzeko izanen da. Obrak hasiak dira, eta heldu den ikasturtetik aitzina hasiko dira ikasleei harrera egiten. Seigarreneko eta bosgarreneko bina klaserekin abiatuko dira, eta ondoko urteetan garatuz joatea da asmoa. Ziburuko (Lapurdi) Manex Erdozaintzi Etxart kolegioa arindu nahi dute Senperekoarekin: Zuraide eta Basusarri arteko ikasleak hartuko ditu. 150 lehen etapan, baina laster 300 ikasle izatea ere espero dute.

Urratsak zubi izanen da aurtengo Herri Urrats-erako hautatu duten leloa, eta Su Ta Gar taldeak eginen du kantua. «Zubiek herria batzen dute, Hego eta Ipar Euskal Herria batzeko lan egiten du Seaskak, eta baita euskara eta jendartea lotzeko ere», esplikatu du Koldo Rodriguez Herri Urratseko koordinatzaileak. «Azken urteetako urratsek zubiak eraikitzeko balio izan dute, eta lan horretan jarraitu behar dugu, zimenduak indartzen». Umorez osatu du Beñat Bidegain Herri Urratseko antolatzaile taldeko kideak: «Su Ta Garrek Herri Urratsen adina du gutxi gorabehera. Belaunaldien arteko zubia egiteko ere balio du». Musika taldeak izan duen jarrera eskertu du Herri Urrats-ek: kantua egiteko deitu zituztenean aste bateko epea eskatu zieten hasieran, baina handik bi ordutara deitu zituzten baiezkoa emanez.

Urtero bezala, aurten ere ekitaldiz betea izanen da Herri Urrats arteko bidea: otsailaren 2an Goazen telesailaren 9. denboraldiko azken kapituluaren aurrestreinaldia eskainiko dute Donibane Lohizuneko (Lapurdi) Le Select zinegelan, eta ondoren aktoreekin solasteko parada izanen da. Martxoaren 4an, Delirium Tremens eta Unidad Alavesa taldeen kontzertua izanen da Miarritzeko (Lapurdi) Atabal gelan. Eta martxoaren 5ean Hitzetik Urratsera bertso saioa eginen dute, Senpereko (Lapurdi) Larreko gelan. Euskal Herriko bertsolari txapelketako zortzi finalistek kantatuko dute. Baina ekitaldi garrantzitsuena apirilaren 2an izanen da: urtebetetze bikoitza ospatuko dute Baionako Lauga gelan: Herri Urratsen 40 urteak eta Pirritx Porrotx eta Marimototsen 35 urteak. Ekitaldi guzien sarrerak salgai daude www.herriurrats.eus webgunean.