UZEIk lehendakari berria du: Lurdes Auzmendi Aierbek hartuko du kargua, UZEIko Batzar Nagusiak hala erabakita. Jon Etxabe ordeztuko du lehendakari gisa.
Auzmendi Ataunen sortua da (Gipuzkoa), 1959an. Itzulpengintzan eta interprete lanetan aritua da, eta, UZEIren irudiko, horrek modua eman dio UZEI eta haren lana eta ekarpena ondo ezagutzeko. Hain zuzen, 1987an EIZIE Euskal Itzultzaile, Zuzentzaile eta Interpreteen Elkartearen sortzaileetako bat izan zen, eta lehendakari ere bai aldi batean. Gainera, 2001etik 2007ra Euskal Herriko Unibertsitatean irakasle izan zen, itzulpengintzako ikasketetan.
Politikan ere jarduna da: Eusko Jaurlaritzan Euskara Sustatzeko zuzendari nagusi izendatu zuten 2009an, eta, ondoren, Hizkuntza Politikako sailburuorde ere izan zen.
Horrenbestez, Jon Etxaberen lekukoa hartuko du Auzmendik. Egindako lana eskertu dio UZEIk Etxaberi: «Azken hogei urteotan, erabateko prestutasuna eta inplikazioa erakusteaz gain, sinergia eta lan ildo berritzaileak indartzeko ahalegin etengabea egin du bere lehendakari lanetan. Horregatik, gure esker ona adierazi nahi diogu bihotzez».
