Lozak dio preso gehiago gerturatu ditzaketela

BILBO. Olga Sanz Martin eta Xabier Moreno Ramajo euskal presoei hirugarren gradua eman eta Villabonako espetxetik (Asturias, Espainia) Basaurira (Bizkaia) lekualdatu dituztela jakinarazi zuten herenegun, eta Jesus Loza Espainiako Gobernuak Araban, Bizkaian eta Gipuzkoan duen ordezkariak adierazi du uda amaitu aurretik balitekeela preso gehiago gerturatzea, baina oraindik ez dagoela «egitasmo adosturik». Espetxe politika berria martxan jartzeko bidea izan daitekeela esan du Lozak, baina uste du presoek «autokritika» egin behar dutela. Langraiz bidea-ren antza izango duen prozedura bat martxan jarriko dutela azaldu du.

Lozaren esanetan, «gizarteratzea babestea» da egokiena, eta argitu du ez dela «erabaki politiko» bat izan preso horiek gerturatzea, legea betetzea baizik. Azpimarratu du bi presoek gerturatuak izateko legezko «eskakizun guztiak» betetzen dituztela.

Sanz eta Moreno EPPK Euskal Preso Politikoen Kolektibotik aldenduta daude; berri agentzien arabera, idatzi bat sinatu zuten bortxaren erabilera arbuiatuz eta barkamena eskatuz. Lozaren esanetan, Basauriko espetxera gerturatu dituzten bi presoak «bidearen eredu» dira, eta «autokritika» egiteko eskatu die gainontzeko presoei eta ezker abertzaleari .

Carlos Iturgaitz PPko eurodiputatuaren iritziz, berriz, Pedro Sanchez presoak gerturatzen hasi da bere inbestidura babestu zuten alderdiak «saritzeko».