«Leninen pentsamendu iraultzailearen gaurkotasuna aldarrikatzeko» kongresua eginen dute gaur eta bihar, Bilboko Euskalduna Jauregian. EHKS Euskal Herriko Kontseilu Sozialistaren Ikerketa Sozialisten Institutuak antolatu du ekitaldia. Gaur 09:00etan hasi dute kongresua, Boltxebismoaren gaurkotasuna izeneko saioarekin, eta Larss Lih, Jodi Dean eta Susasn Weissman egon dira solasaldian. Eguerdian hasi da bigarren saioa (Lenin eta Hegelen Logikaren Zientzia izenekoa), eta Helena Sheelan eta Kevin B. Anderson adituak egon dira bertan. Bertze bina saio izanen dituzte gaur arratsaldean, eta bihar egun osoan zehar.
Hitzaldi sorta Leninen heriotzaren 100. urtemugaren baitan antolatu dute, haren pentsamendua «eguneratzea» dutela helburu. Bide horretatik, pentsamendu horren «indarguneak eta ahultasunak» landuko dituzte sei saio horietan, eta ahaleginduko dira ulertzen «gaur egun, Leninen pentsamendua zer izango litzatekeen». Hau da, zer den «harengandik irauten duena». Nazioartean aritzen diren hainbat adituk jardunen dute saioetan, eta baita EHKSko hainbat militantek ere.
