Lau gune hartuko ditu Tantaz Tantak 11rako prestatu duen egitarauak

Euskal presoen eskubideen aldeko aldarriak urtarrilero hartu ohi ditu Bilboko kale nagusiak. Oso jendetsuak izan dira azken urteetan egin diren manifestazioak, eta aurten, Bilbo «itsaso» bihurtzea jarri du helburu mobilizazioa antolatzeko ardura hartu duen Tantaz Tanta plataformak. Ohiko manifestazio eredua baztertu, eta Bilboko hainbat txoko jendez bete nahi ditu egun osoan. Arratsalderako egin du deialdi nagusia, 17:30etik aurrera. Baina goizetik bildu nahi ditu itsasoa osatuko duten tantak, eta egitarau oparoa antolatu du Areatzan, lau gunetan banatuta.

Konponbideari begirako giro politiko berezian egingo dute aurtengo ekitaldia, presoak sakabanatzeko politikak 25 urte beteko dituen urtean, gainera. «Presoak Euskal Herrira ekartzeko garaia da», adierazi dute antolatzaileek bertan parte hartuko duten artista eta boluntarioekin egindako agerraldian.

Antolatzaileek ohartarazi dute sakabanaketak, 1989. urtean abiatu zenetik, familia askori «sufrimendua, istripuak eta zigorrak» besterik ez diela ekarri. Horren adierazgarri, auto istripuek eragindako 16 heriotza eta ehunka zauritu.

Espainiako eta Frantziako gobernuak, ordea, «bakeari ateak ixten tematurik» daudela ikusi du herri plataformak, eta seguru dago gobernuek bere kasa «urrats txikiena ere» ez dutela egingo. Beraz, «gizartearen txanda» dela dio. Herritarren indarra biltzeko antolatu du, beraz, urtarrilaren 11ko mobilizazioa: «Ideologia eta interes partikular oro alde batera utzita, esan dezagun argi eta garbi konponbidea nahi dugula eta presoak Euskal Herrira ekartzeko garaia dela», adierazi dute herritarrei bertaratzeko deia egiteko.

11:00etatik 23:00etara

Aldarri eguna 11:00etan hasiko da Bilboko Areatzan. Lau gune izango dira bertan, eta haur, gazte zein helduentzako ekitaldiak izango dira: pailazoak, puzgarriak eta rokodromoa egongo dira; Gozategi, Petti, Doctor Deseoko Francis, Hesian eta Xabi Solanoren musika emanaldiak, besteak beste; presoek egindako artelanen erakusketa eta artista ezagunek doan emandako artelanen enkantea. Material salmenta. Taberna, pintxoak, ogitartekoak eta kafea, esaterako.

17:30ean «bi olatu handi» abiatuko dira Casillatik eta udaletxetik Zabalburura. Eta irudi nagusia handik ordubetera ikusiko da: ibilbidea beteko duen «itsasoa». Ondoren ere, hainbat ekitaldi eta kontzertu izango dira Areatzan: Gose, Xutik eta Kaotiko.

Eguneko pasarte guztiak jasotzeko, bestetik, aplikazio berezi bat prestatu du Hack.in#badakigu elkarte informatikoak. www.zuzenean.tantaztanta atarian eguneko informazio guztia bilduko dute, eta herritarrek, Android sistema erabilita, mota guztietako ekarpenak egiteko aukera izango dute.

Urtarrilaren 11ko egitaraua osorik ikusteko, bisitatu webgune hau:

www.tantaztanta.info