Lasserre eta Etxeto lehen ministroaren aholkulariarekin bilduko dira

Abenduaren 18an bilduko dira Jean-Marc Ayrault Frantziako lehen ministroaren aholkulariarekin Jean-Jacques Lasserre Hautesien Kontseiluko presidentea eta Jean Baptiste Etxeto Garapen Kontseilukoa. Ipar Euskal Herriarentzako lurralde hitzarmena ukanen dute aipagai. «Hitzarmen mamitsua egitea eta Euskal Herriaren berezitasunak kontuan hartzea galdetuko diogu», Lasserren hitzetan.

Atzo bildu zen Lasserre Philippe Yvin Lehen ministroaren aholkulariarekin. «Argi utzi diot lurralde hitzarmenak mamitsua izan beharko duela, bestela ez dela ibiliko». Euskal lurralde elkargoaz gutxi mintzatu ziren, ordea: «Ez nintzen horri buruz hitz egiteko biltzen harekin». Bilera hori Jean-Marc Ayrault lehen ministroak Lasserre eta Etxetori igorri gutunaren segida izan da. Batera-k bere lau aldarrikapenak —lurralde elkargoarena barne— karrikara atera zituen larunbatean Maulen, eta Frantziako Gobernuaren «mespretxua» salatu.